Ыас туһунан

Туостан ыас оҥороллор диэни истибиккит, билэҕит дуо? Хайдах оҥороллоро буолуой? Манна көрүҥ.

Бу туһунан Т.Гуляева суруйуутун халандаарга таһаарбыттар. Кини маннык быһаарбыт.

Өбүгэбит ыаһы туостан оҥороро. Туоһу бэс ыйын 10  күнүттэн от ыйа бүтүөр диэри хастыахха сөп. Хастыырга хатыҥ этин бааһырдыллыа суохтаах.

Туоһу хастаан баран, ньалакатын сытыы быһаҕынан ыраастаныллар. Бытархай гына кыптыыйынан кырыйыллар. Кырыллыбыт туоһу сиигирдэ эрэ соҕус убаҕас сүөгэйинэн ибиириллэр.

Сиигирбит туоһу чугуун иһиккэ, буор көһүйэҕэ угуллар. Уу кута-кута булкуйуллар. Буруолуор, түүрэ тардан хараарыар диэри ити курдук оргутуллар. Түүрэ тарпыт туоһу хаптаһыҥҥа ууран үлтү мэлийэллэр. Ыас илиигэ сыстаҥныа суохтаах.

Т.Гуляева

Саха ыалын халандаарыттан, 2025 с.