Ыксаллаах-быһыы майгы үлэһитэ пауэрлифтиҥҥэ саҥа рекордтары олохтоото

Камчатка кыраайын Елизово куоратыгар пауэрлифтиҥҥэ Уһук Илин федеральнай уокурук чөмпүйэнээтэ ыытылынна. Күрэхтэһии чаҕылхай кыттааччыларын быыстарыгар Саха сириттэн  Ленскэй куорат ЫБМ үлэһитэ Алексей Островскай ураты ситиһиилэннэ. Бу туһунан ЫБММ  пресс-сулууспата иһитиннэрэр.

Островскай успуорка бэлэмин үрдүк таһымын көрдөрдө – чөмпүйүөн аатын ылан эрэ баран тохтообото, өрөспүүбүлүкэ хас даҕаны рекордун саҥарта. Итини таһынан, кини күрэхтэһии судьуйаларын кэллиэгийэтигэр киирэн, тэхиниичэскэй хонтуруолуор эбээһинэһин толордо. 105 киилэҕэ диэри ыйааһыннаах категорияҕа Алексей Островскай кыһыл көмүс мэтээли ылла. Оттон бары ыйааһын категорияларын бөҕөстөрө күрэхтэспит абсолютнай бастыыр иһин киирсиигэ, боруонса мэтээлгэ тиксэн, Уһук Илин эрэгийиэнин биир күүстээх пауэрлифтерынан буоларын өссө төгүл дакаастаата.

Алексей киирсиитэ Саха сирин пауэрлифтиҥэр устуоруйаҕа киирдэ: кини становай тягаҕа 302,5 киилэни көтөҕөн, Саха Өрөспүүбүлүкэтин саҥа рекордун олохтоото уонна үс көрүҥ (троеборье) түмүгүнэн 767,5 киилэни көрдөрөн, эмиэ өрөспүүбүлүкэ рекордун саҥарта. Тэҥнээн көрдөххө, 2019 сыллаахха ыытыллыбыт УИФО чөмпүйэнээтигэр күрэсчит 620 киилэни көрдөрбүтэ. Алексей Островскай тус ситиһиилэрэ Саха сирин сүүмэрдэммит хамаандатын уопсай түмүгэр улахан кылааты киллэрдэ. Хамаанда иккис миэстэни ылан, Куубагынан наҕараадаланна.

«Күрэхтэһии Алексей Островскай бэртээхэй бэлэмнээҕин уонна кыаҕын өссө үрдэтэ турарын бигэргэттэ. Кини уһулуччулаах ситиһиилэрэ утарсааччыларыгар үрдүк кирбиини туруорар уонна өрөспүүбүлүкэ эдэр пауэрлифтердарыгар кынаттыыр холобур буолар. Күрэсчит уонна судьуйа оруолун дьүөрэлээһинэ кини успуорт эйгэҕэ аптарытыатын уонна пауэрлифтинг сайдыытыгар бары өттүнэн кыттыһарын бэлиэтиир», — диэн ЫБММ бэлиэтээтилэр.