ЫБММ халаан туругун кэтээн көрөргө космическай аргыстары туһаныаҕа

Сааскы халаан уонна баһаар сезонун кэмигэр Арассыыйа ЫБММ-тэ «Роскосмос» госкорпорация  мобильнай хабар-ыытар комплексын, ону тэҥэ элбэх функциялаах киһитэ суох авиационнай  систиэмэни туһаныаҕа.

ЫБММ эрэгийиэннээҕи управлениета иһитиннэрбитинэн, мобильнай комплекс Сир аргыстарыттан дааннайдары хомуйар уонна оҥорор, ону тэҥэ ретрансляциялыыр аргыстар нөҥүө РСЧС структуратын суһал космическай дааннайдарынан хааччыйар.

“Чуолкай космическай түһэриилэр муус харыытын кэмигэр булан туората охсорго, ойуур баһаара тарҕаныытын барыллыырга наадалаахтар”, — диэтэ Саха сиринээҕи ЫБМ управлениетын начаалынньыгын солбуйааччы Станислав Алексеев.

Биэдэмистибэҕэ эбэн эппиттэринэн, халаан уонна баһаар кутталын кэмигэр аргыстан түһэрии наада диэн 100 көрдөбүл киирбит.

“Мобильнай комплекс көмөтүнэн хомуллубут иһитиннэрии суһаллык РСЧС управлениетын уорганнарыгар бэриллэр. Ол түмүгэр кэмигэр наадалаах сэрэтэр тэрээһиннэр ыытыллаллар”, — диэн кэпсээтэ ЦУКС ыстаарсай эпэрэтиибинэй дьуһуурунайа Павел Рудых.

Сыл аайы ЦУКС исписэлиистэригэр анаан космическай кэтээн көрүү уонна Сир дистанционнай зондированиетын дааннайдарын туһаныы бырагырааматынан теориянан үөрэтиилэр уонна практическай дьарыктар ыытыллаллар.

Маны таһынан халаан уутун уонна баһаар кэмин куттала суох аһарыыга киһитэ суох авиационнай  систиэмэни туһаныахтара. Комплекс састаабыгар икки “Орлан-10” сөмөлүөттүү быһыылаах киһитэ суох көтөр аппарааттар киирэллэр.

Комплекс ыксаллаах быһыы-майгы буола турар улуустарын хонтуруоллуур, дьону көһөрөр суолу ыйан биэрэр, аэрофототүһэриилэри оҥорор. Бу туһугар “Орлан-10” фотокамералаах уонна телекамералаах.

Комплекс сүрүн үчүгэйэ: 120 км диэри радиустаах сиртэн дааннайдары биэрэр кыахтаах. Оттон автономнай эрэһиимҥэ сылдьан 500 км эргимтэлээх сири көрөр; -30 кыраадыстан +40С-ка диэри үлэлиир; 10 чаастан кырата суох көтөр; сиртэн муҥутуур үрдүгүнэн көтүүтэ – 5 км; кэмпилиэк экипаһа 3 киһиттэн турар,  диэн иһитиннэрэр Ил Дархан, бырабыыталыстыба пресс-сулууспата.