ЫБММ сэрэтэр: Чульмаҥҥа 26 даачаны уонна икки дьиэни уу ылыан сөп

Нерюнгри оройуонугар Чульман өрүскэ элбэх ардах түспүтүнэн уу таһыма күүскэ тахсара бэлиэтэнэр. Бөһүөлэккэ намыһах сирдэри уу ылбыт. Бу туһунан Саха сиринээҕи ЫБММ пресс-сулууспата иһитиннэрэр.

«Саамай куһаҕан түгэҥҥэ, Чульман өрүс уутун таһыма 650 см тиийдэҕинэ, Чульман бөһүөлэгин 26 даачатын тэлгэһэтин уонна 2 дьиэни уу ылыан сөп диэн сабаҕаланар», — диэн биэдэмистибэ иһитиннэриитигэр этиллэр.

Исписэлиистэр даача учаастактарын бэрэбиэркэлээбиттэр, ол кэмҥэ онно 11 киһи баар эбит. Кинилэртэн сэттэ киһи эвакуацияламмыт, икки киһи бэйэтэ барбыт, оттон иккитэ көһөртөн аккаастаммыттар.

Быстах кэмҥэ олорор пууннары тэрийии ирдэммэт, тоҕо диэтэххэ, даачалар бас билээччилэрэ бары Чульман бөһүөлэгэр олорор дьиэлээхтэр, оттон даачаларын сайын эрэ туһаналлар. Бары сэрэтэр дьаһаллар толору ыытыллыбыттар. Быһылаан буолбут сиригэр суһал сулууспалар, ол иһигэр Нерюнгритааҕы быыһыыр гарнизон үлэһиттэрэ үлэлииллэр. Быыһыыр үлэҕэ 22 киһи уонна 4 тиэхиньикэ тардыллыбыт.