Үбү-харчыны сатаан туттарга үөрэтэр волонтердар сүлүөттэрэ саҕаланна

Бүгүн, ахсынньы 13 күнүгэр, СӨ Үп министиэристибэтигэр үбү-харчыны сатаан туттарга үөрэтэр волонтердар сүлүөттэрэ ыытыллыаҕа диэн биэдэмистибэ иһитиннэрэр.

Эрэгийиэн олохтоохторо үбү-харчыны сатаан тутталларын үөрэтиигэ, тирээн турар боппуруостары дьүүллэһэргэ, уопуту атастаһарга бу сабыытыйа көхтөөх кыттааччылары түмүөҕэ”, — диэтэ СӨ Үп миниистирин э.т. Иван Алексеев.

Волонтердар үлэ сүрүн хайысхаларын дьүүллэһиэхтэрэ, ол иһигэр үп-харчы инструменнарын туһунан билиилэрин кэҥэтиэхтэрэ, тус бэйэ бүддьүөттэрин былаанныы, нэһилиэнньэни түөкүттэртэн көмүскүүр миэрэлэри  ыла үөрэниэхтэрэ, актыбыыстар саҥа көҕүлээһиннэрин билсиэхтэрэ.

Тэрийээччилэр этэллэринэн, бу сүлүөт эрэгийиэн олохтоохторо үп-харчы өттүнэн билиилэрин үрдэтэллэригэр туһуламмыт уһун болдьохтоох бырагыраама суолталаах түһүмэҕинэн буолар.

Тэрээһин «СӨ нэһилиэнньэтэ 2024-2027 сс. үбү-харчыны сатаан туттар таһымын үрдэтии” эрэгийиэннээҕи бырагыраама чэрчитинэн тэрилиннэ.