Үбүлүөйдээх “Инникигэ хардыы” кэмпириэнсийэ үөрүүлээх аһыллыыта буолла

Лоп курдук 30 сыл анараа өттүгэр баара-суоҕа сүүстэн эрэ арыый тахса кыттааччылаах эдэр чинчийээччилэр кэмпириэнсийэлэрэ үрдээн, сайдан быйылгы үбүлүөйдээх сылга өрөспүүбүлүкэ бары улуустарыттан 1500-тэн тахса оҕо кыттар.

Таһыма сыллата улаатан, эдэр чинчийээччилэр, педагогтар сэҥээриилэрин ылан, кыттыан баҕалаах оҕо үксээн иһэр. “Триумф” спортсменнары бэлэмниир киин тохсунньу ортото Саха сирин чинчийэр оҕолорунан туолар.

Бүгүн “Инникигэ хардыы” үбүлүөйдээх тэрээһин үөрүүлээх аһыллыытыгар Ил Дархан Айсен Николаев кытынна. “Бу сыллар тухары “Инникигэ хардыы” кэмпириэнсийэ дойдуга үөрэх биир бастыҥ бырайыагынан, Уһук Илин уокурукка үөрэнээччилэр бастыҥ чинчийэр бырайыактарынан буолар. Биһиги оҕолорбутунан, ситиһиилэринэн киэн туттабын. Сыллата манна көрдөрөр саҥаны айыыларгыт таһыма билим, олоххо ирдэнии өттүнэн үрдээн иһэллэр” – диэн тыл этэригэр бэлиэтээтэ.

Ил Дархан тэрээһин кэмигэр сиэксийэлэринэн сылдьан эдэр чинчийээччилэр бырайыактарын, үлэлэрин кытта билистэ. “Оҕолор миэхэ орбитаҕа 541 килэмиэтир үөһэнэн көтө сылдьар арыалдьыт-космическай аппараат туһунан кэпсээтилэр. Онтон кэлэр сигналы оҕолорбут тус билимҥэ үлэлэрин оҥорууга туһаныахтара” – диэн эттэ.

Үөрэх эйгэтигэр үтүөлэрин иһин “РФ үөрэҕин бочуоттаах үлэһитэ” үрдүк ааты Билим Дьоҕус академиятын эрэгийиэннээҕи киинин иитэр үлэҕэ салаатын начаалынньыга Ирина Антоноваҕа, СӨ Ил Дарханын махтал суруктарын Амматааҕы лиссиэй билим-мэтиэдикэ үлэтигэр дириэктэри солбуйааччы Николай Захаровка, ХИФУ билимҥэ, инновацияҕа департаменын ыччат билимин сайыннарыыга салаатын начаалынньыга Александр Егоровка туттарда.

2024 сыллаахха Саха сирин учуонайдарын ааттарын үйэтитэр инниттэн оскуола билимин сайыннарыыга кылааттарын киллэрбит учуонайдар  Анал истипиэндьийэлэрин олохтообуттара. Ил Түмэн дьокутаата, “Барҕарыы” пуонда дириэктэрэ Афанасий Постников “Уһуйааччы-учуонай” түөскэ иилинэр бэлиэлээх Н.Г.Соломонов аатынан истипиэндьийэни ХИФУ айылҕа үөрэҕин институтун полимернай нанокомпозит технологическай лабаратыарыйатын сүрүн билимҥэ үлэһитигэр, тиэхиньиичэскэй билим дуоктарыгар, бэрэпиэссэр Галина Охлопковаҕа, “Новатор-педагог” түөскэ иилинэр бэлиэлээх Ю.М.Григорьев аатынан истипиэндьийэни Чурапчы гимназиятын эбии үөрэхтээһиҥҥэ педагога, РФ үтүөлээх учуутала, норуот үөрэҕириитин туйгуна Мария Хоютановаҕа, “Саҥаны киллэрээччи педагог” түөскэ иилинэр бэлиэлээх Г.Н.Решетников аатынан истипиэндьийэни Уус Алдан улууһун Дүпсүн оскуолатын дириэктэрин үөрэх-мэтиэдикэ үлэтигэр солбуйааччы, саха тылын, литэрэтиирэтин учуутала, РФ үөрэҕириитин туйгуна  Ньургуйаана Сивцеваҕа туттарда.