Үбүлүөйдээх сылы түмүктүүр тэрээһин буолан ааста

Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан ааста – биллиилээх олоҥхоһут А.Е.Соловьев-Соһу төрөөбүтэ 90 сыла. 

Афанасий Соловьев 1935 сыллаахха муус устар 5 күнүгэр Нам улууһун Таастаах сэлиэнньэтигэр төрөөбүтэ. I Нөөрүктээйиттэн төрүттээх  Екатерина Горбунованы кэргэн ылан, 1960-с сыллар бүтүүлэриттэн Өлүөхүмэ улууһугар олохсуйбуттара.

Сайын I Нөөрүктээйигэ Аҕа дойду Улуу сэриитигэр кыайыы 80 сылыгар уонна Афанасий Егорович үбүлүөйдээх сылыгар аналлаах ыһыах ыһыллыбыта.

Ааспыт нэдиэлэҕэ олохтоох бибилэтиэкэрдэр О.И.Роева уонна Е.Н.Роева дьоҥҥо-сэргэҕэ олоҥхоһут олоҕун, айар үлэтин туһунан билиһиннэрдилэр. Оксана Ивановна Афанасий Соловьевка аналлаах биэс кинигэ туһунан сиһилии кэпсээтэ. Ол кэннэ Елизавета Николаевна Саха сирин олохтоохторугар киэҥник биллибит Афанасий Егорович “Уолан Дохсун” олоҥхотунан Кыыллаах нэһилиэгин олохтоохторо олус бэркэ туруорбут (режиссер Лавернова Р.Е.) киинэлэрин итиэннэ олоҥхоһут олоҕун араас сылларыттан хаартыскалары көрдөрдө.

Өссө сэбиэскэй кэмҥэ, Афанасий Егорович тыыннааҕар, нэһилиэк бибилэтиэкэтин (Роева О.И.) көҕүлээһининэн I Нөөрүктээйи кулууба “Уолан Дохсун” олоҥхотунан театрализованнай туруорууну көрдөрбүтэ. Сүрүн оруолларга Николай Эверстов, Галина Филиппова уонна Торговкиннар дьиэ кэргэн оҕолоро оонньообуттара. Бу туруоруу А.Е.Соловьев салгыы айар-тутар үлэтигэр күүстээх өйөбүл буолбута.

Бу буолан ааспыт биэчэргэ, оннооҕор мин, Афанасий Егорович чугас доҕоро, тутууга үгүс сыл бииргэ үлэлээбит киһитэ, доҕорум туһунан сэрэйбэтэх даҕаны үгүс кэпсээммин иһиттим. Истиҥ тэрээһиннэрин иһин бибилэтиэкэрдэрбитигэр махтанабын, өссө да үгүс, сэргэх тэрээһиннэри ыыта туралларыгар баҕарабын!

Александр Бири, Арассыыйа суруналыыһа.