Үбүлүөйгэ анаан Бүтүн Арассыыйатааҕы «Дальний Восток – Земля приключений» куонкурус хаартысканан быыстапката аһылынна

Үбүлүөйдээх Илиҥҥи экэнэмиичэскэй пуорумҥа анаан Владивостокка Өрөбөлүүссүйэни Туруулаһааччылар болуоссаттарыгар киэҥ далааһыннаах хаартысканан быыстапка аһылынна.

РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ Юрий Трутнев көҕүлээһининэн ыытыллыбыт экспозиция Бүтүн Арассыыйатааҕы «Дальний Восток – Земля приключений» куонкурус финалистарын үлэлэрин кытта билиһиннэрэр.

«Уһук Илин араас көрүҥнээҕэ киһини сөхтөрөр. Бу тыйыс Арктика, туундара, тайҕа, Камчатка уонна Курильскай арыылар утуйа сытар уонна эстэ турар вулканнара, аан дойду саамай дириҥ күөлэ — Ытык Байкал, Хабаровскай кыраай Шантаардааҕы арыылара, ураты үүнээйи уонна кыыл-сүөл дойдута. «Дальний Восток – Земля приключений» куонкурус кыттыылаахтара айылҕа кэрэтин, дьон-сэргэ тулуурун уонна санаатын күүһүн, уустук туристическай маршруттар тустарынан киинэлэри усталлар. Быыстапка бу айаннар тустарынан кэпсиир уонна Уһук Илин кэрэ айылҕатын илэ хараххытынан көрөргө ыҥырар», — диэтэ Юрий Трутнев.

Хаартысканан быыстапкаҕа Уһук Илин эрэгийиэннэрэ бары, ол иһигэр Саха сирэ баар.  Ол курдук, Нина Слепцова хаартыскаларыгар Саха сирин устун айаны көрүөххэ сөп. Баҕалаах дьоҥҥо билигин да кыттааччылар кэккэлэрин хаҥатар кыах баар. Үһүс сезоҥҥа сайаапкалары 2026 сыл тохсунньу 15 күнүгэр диэри ылыахтара.

Хас биирдии макекка QR-код баар, ону сканердаан баран, куонкурус финалиһа устубут кылгас киинэтин көрүөххүтүн, ону тэҥэ маршрут хайдаҕын сиһилии билсиэххитин сөп, диэн Ил Дархан, бырабыыталыстыба пресс-сулууспата иһитиннэрэр.