Ыччаппыт дойдубут хаһаайыттара буола үүнэллэригэр салайан биэриэххэ

Арктикатааҕы ГАТУ республикаҕа быыстала суох аграрнай үөрэхтээһин систиэмэтин олохтооһуҥҥа киэҥ хабааннаах үлэни ыытар. Үлэ сүрүннээн агро хайысхалаах оскуолалары кытта барар.

Бүгүн университет ректора, Ил Түмэн депутата Валерий Федоров Хаҥалас улууһун 1 Дьөппөн санаторнай оскуола-интернатын, Горнай улууһун Күөрэлээх уонна Үөһээ Бүлүү улууһун Балаҕаннаах оскуолаларын салайааччыларын кытта көрүстэ. Сүрүннээн бииргэ үлэлэһии, университекка үөрэххэ туттарсыы, тыа хаһаайыстыбатын саҥа таһымҥа таһаарарга баҕалаах, тыа сирин хаһаайыттара буолар интэриэстээх ыччат дьону иитии тула кэпсэтии таҕыста.
1 Дьөппөн санаторнай оскуола-интернатын директора Марина Ли оскуола былырыыҥҥыттан агротехнологическай кылаастаах республикатааҕы инновационнай былаһаакка быһыытынан үлэлиирин кэпсээтэ. «Үлэбитин оҕолору практикаҕа илдьэн саҕалаабыппыт. Арыы собуотун, бааһынаҕа тыраахтар үлэтин кытта билиһиннэрэн, идэһэҕэ илдьэ сылдьан, тыа хаһаайыстыбатын үлэтин көрдөрбүппүт. Соһуйуохпут иһин, оннооҕор тыа сирин оҕолоро маннык үлэ хаамыытын билбэттэр эбит. Салгыы оскуолабытыгар «Мин – сирим-дойдум хаһаайынабын» диэн ааттаах бырайыагы үлэлэттибит. Билиҥҥитэ оҕолор харахтара умайар, интэриэс баар, тыа сирэ диэн хаалыылаах салаа буолбакка, төттөрүтүн, дохуоту аахсыахха сөптөөх хайысха диэн өйдөбүлү иитэргэ дьулуһабыт», – диэн Марина Ли кэпсээтэ.
Арктикатааҕы ГАТУ Саха сиригэр тыа хаһаайыстыбатын идэлээх үлэһиттэрин бэлэмнээн таһаарар соҕотох үөрэх кыһата буоларынан, бу салаа саҥа таһымҥа тахсарыгар быһаччы эппиэтинэһи сүгэр. «Биһиги аныгы технологияны, цифровизацияны толору баһылаабыт аныгылыы толкуйдаах исписэлиистэри иитэн таһаарар соруктаахпыт. Онон олох сайдыытын кытта тэҥҥэ үлэбит хайысхатын көннөрөн, сайыннаран биэрэ олоробут. Холобур, Өктөмнөөҕү филиалбыт базатыгар роботизированнай ферма оҥорор былааны тутабыт, үлэ барар. Устудьуоннарбытын БПЛА диэн аныгы технологияны баһылыырга үөрэтэбит. Агродрон көмөтүнэн араас культураны олордууттан, уу кутууттан, уоҕурдууну ыһыыттан саҕалаан, сүөһүнү маныырга тиийэ сатабылга үөрэнэллэр. Үсүһүнэн, выпускниктарбыт университеты дипломнарыгар икки квалификациялаах бүтэрэр буолуохтара. Холобур, «зоотехник-экономист», «агроном-айти-специалист» диэн дипломнаах буоллахтарына, үлэлиир хайысхалара кэҥээн, агробизнеска баралларыгар кыах кэҥиэхтээх», — диэн АГАТУ ректора Валерий Федоров этэр. «Бииргэ үлэлэһиибит сүрүн соруга – ыччаппыт тыа сирин дьиҥнээх хаһаайыттара буола үүнэн-сайдан тахсалларын ситиһии. Сирдээх-уоттаах, ол онно бэйэлэрэ олорор, онтон аһыыр-таҥнар, ыччаттарын иитэр буоллахтарына – бу сир хаһаайыннаах буолар, ким да былдьыыр, туораттан сананар кыаҕа суох буолар. Бу маны ыччаттарбыт өйдөөн, аныгы технологияны баһылаан, тыа хаһаайыстыбатын кыаҕын барытын толору туһанан, үчүгэй дохуоту аахсар буолуохтаахтар. Атахтарыгар бигэтик үктэнэр, дойдуларын дьиҥнээх хаһаайыттара буолалларыгар биһиги салайан биэриэхтээхпит», — диэн Валерий Федоров тоһоҕолоон бэлиэтээтэ.

Көрсүһүү түмүгэр Арктикатааҕы ГАТУ уонна Хаҥалас улууһун 1 Дьөппөн санаторнай оскуола-интерната, Горнай улууһун Күөрэлээх оскоулата бииргэ үлэлэһии сөбүлэҥин баттастылар.

Ньургуяна Хаптасова