Ыччат бэстибээлэ аһылынна

Дьокуускайга Үлэ кыбаарталыгар аан бастаан «Работай в Якутии» ыччат бэстибээлэ ыытылла турар.

Бэстибээл чэрчитинэн, үлэ дьаарбаҥката, ситиһиилээх урбаанньыттары кытта көрсүһүүлэр, лиэксийэлэр, кэпсэтиилэр, квест-оонньуулар, о.д.а. буолаллар.

От ыйын 16 күнүгэр Үлэ кыбаарталын тэлгэһэтин былаһааккатыгар бэстибээл аһыллыыта буолла. Ыччат сөбүлүүр ырыаһыттара ырыаларын бэлэхтээтилэр. Ыччат тэрээһинэ диэх курдук, бэрт сэргэх, тэтимнээх, ураты суоллаах.
Бэл, баһаарынай массыынаттан ууну ыстаран, уотунан тыктаран, арылхай кустугу дьэрэлитэн көрдөрдүлэр.

Манна буола турар үлэ дьаарбаҥкатыгар өрөспүүбүлүкэ улахан тэрилтэлэрэ, үөрэх кыһалара кытталлар, вакансияларын кэпсииллэр, аныгы технологияларын көрдөрөллөр, таарыйа маастар-кылаастары оҥороллор, араас үөрүйэхтэргэ үөрэтэллэр.