«Кадры» нацбырайыак чэрчитинэн ыччаттар бастыҥ бырамыысыланнас хампаанньаларыгар үлэҕэ киирэллэр

РФ Бэрэсидьиэнэ Владимир Путин көҕүлээбит «Кадры» национальнай бырайыагын састаабыгар киирэр «Дьарыктаах буолууга көхтөөх көмө» федеральнай бырайыак чэрчитинэн Томпо улууһун Хаандыга бөһүөлэгэр баар хайа-геологическай тиэхиньикумҥа эдэр исписэлиистэри үөрэттилэр, диэн sakha.gov.ru иһитиннэрэр.

Эдэр исписэлиистэр үөрэхтэрин түмүктээн, «Полиметалл» хампаанньа Нежданинскайдааҕы хайа-байытар кэмбинээтигэр икки ыйдаах стажировкаҕа ыытылыннылар. Стажировка кэнниттэн Саха сирин ыччата көмүһү хостуур хампаанньа биир тэрилтэтигэр үлэҕэ киириэхтэрэ.

«Икки ый усталаах кылгас кэмнээх куурустар Саха Өрөспүүбүлүкэтин идэҕэ эрдэттэн бэлэмниир киинин (ЦОПП) уонна биһиги индустриальнай партнербыт — «Полиметалл» хайа-хостуур хампаанньатын кытта бииргэ үлэлэһэн тэрилиннилэр. Уолаттар үөрэхтэрин балаҕан ыйыгар саҕалаабыттара, оттон сэтинньигэ аттестацияны «туйгуннук» аастылар», — диэн хайа-геологическай тиэхиньикум дириэктэрин үөрэх-производственнай үлэҕэ солбуйааччыта Лена Абрамова иһитиннэрдэ.

«Дьарыктаах буолууга көхтөөх көмө» федеральнай бырайыагынан босхо үөрэҕи «Работа России» портал нөҥүө сайабылыанньа биэрэн ааһыахха сөп. Бырагыраама үлэтэ суох дьоҥҥо да, идэлэрин уларытыан эбэтэр квалификацияларын үрдэтиэн баҕалаах үлэлии сылдьар дьоҥҥо аһаҕас. 2025 сылга Саха сирин 700-тэн тахса олохтооҕо Идэҕэ эрдэттэн бэлэмниир киин (ЦОПП) бырагыраамаларынан үөрэххэ киирдэ. Саҥа кыахтар тустарынан нэһилиэнньэни биллэрэр-иһитиннэрэр инниттэн, киин араас сыаллаах-соруктаах аудиторияҕа анаан сирэй көрсөн үлэлиир тематическай былаһааккалары тэрийэр. Нежданинскайдааҕы хайа-байытар кэмбинээт (ГОК) Саха сирин хотугулуу-илинигэр, Томпо улууһугар, «Полиметалл» саамай үрдүк хайалаах карьера баар сиригэр турар. Кэмбинээт сылга 2,2 мөл. туонна руданы туһанар кыамталаах байытар фабриката икки сиртэн хостонор руданы (Нежданинскай уонна Прогноз) таҥастыыр. Бүтэһик бородууксуйа – күүстээх руда концентрата  салгыы таҥастанарыгар Амурскайдааҕы гидрометаллургическай кэмбинээт (АГМК) диэки ыытыллар.