«Ыччат кииннэрин эһиилгиттэн улуустарга киллэрэн барыахпыт»

Ыччат миниистирэ Петр Шамаев, Ил Дархан ыччат бэлиитикэтигэр болҕомто күүскэ уурарын бэлиэтиир:

-Ил Дархан бүгүҥҥү этиитэ олохпут бары эйгэтин хапта, ордук тыа сирин олоҕор болҕомто ууруллубута үөртэ.

Биир үксүн норуот төрүт үгэһэ, култуурата тыа сиригэр баар, бу Саха сиригэр олорор норуоттарга барыларыгар сыһыаннаан этэбин. Сомоҕолоһуу сылын кытта холбуу Култуура сыла барыбытын түмүө диэн үөрэбин, бу эйгэҕэ элбэх ыччат үлэлиир, элбэх хамсааһын барыа,  бары бииргэ үлэлиэхпит.

Ил Дархан ыччат бэлиитикэтигэр болҕомтотун күүскэ уурара көстөр. Ааһан эрэр сылга саамай улахан ситиһиибит, кыайыыбыт Дьокуускайга “Патриот” ыччат киинин арыйыы буолар. Маннык бырайыактары эһиилгиттэн улуустарга арыйар былааннаахпыт. Ыччат бэйэтин сайыннарар күүһүн-кыаҕын куоракка эрэ буолбакка, өрөспүүбүлүкэҕэ барытыгар күүскэ киллэриэхтээхпит. Онон Ил Дархан Ил Түмэҥҥэ туһаайан этиитин тосхолунан бу хайысханан барыахпыт, күүскэ үлэлиэхпит диэн эрэннэрэбит.