Ыччат спартакиадатын сүүмэрдиир түһүмэҕэ саҕаланыа

Оройуоннарга былаһааккалары талыы, волонтердары тардыы, куттал суох буолуутун хааччыйыы уонна сэлиэнньэлэргэ, куорат тастарыгар хамаандалар икки ардыларыгар күрэхтэһиигэ мэдиссиинэ арыаллааһынын боппуруостара быһаарыллаллар. Ахсынньы 8-10 күннэригэр буолар түмүктүүр түһүмэх кыттыылаахтарын сэтинньи 29 күнүгэр диэри чопчулуохтара.

«Спартакиада сыала-соруга ыччаты байыаннай-патриотическай иитиигэ, анал байыаннай эпэрээссийэҕэ бэйэлэрин баҕаларынан кыттааччылары өйүүргэ, туһаайылынна. Оттон далааһыннаахтык тэрээһин ыччаты успуордунан тиһиктээхтик дьарыктанарга угуйуо«, — диэн СӨ Бырабыыталыстыбатын бэрэссэдээтэлин солбуйааччы Сергей Местников бэлиэтиир.

Спартакиада бырагырааматыгар баскетбол, сыал ытыыта, хабылык уонна хаамыска, байыаннай эстэпиэтэ, канат тардыһыыта бааллар. Хас биирдии хамаандаҕа 11 спортсмен уонна үстүү бэрэстэбиитэл — тириэньэр бааллар.