Ыччат түмсэр сирэ – «Патриот» киин

2025 сыл ахсынньы 15 күнүгэр Дьокуускай 202-с микро-оройуонугар куорат уонна чугастааҕы ыччат көрсүһэр, кэпсэтэр сирэ буолар аналынан, элбэх өҥөнү оҥорор “Патриот” ыччат киинэ аһылынна.

Саҥа эбийиэк Арассыыйа Бэрэсидьиэнэ Владимир Путин уонна Ыччат дьыалаларыгар федеральнай ааҕыныстыба өйөбүллэринэн «Эрэгийиэн — эдэрдэргэ» Бүтүн Арассыыйатааҕы куонкурус, «Арассыыйа — кыахтаах дойду» эрэгийиэннээҕи бырайыак, «Ыччат уонна оҕолор» национальнай бырайыак чэрчитинэн үлэтин саҕалаата.

Киин үөрүүлээх аһыллыытын сиэригэр-туомугар олохтоохтор, былаас, ыччат тэрилтэлэрин бэрэстэбиитэллэрэ уонна атын да эрэгийиэннэртэн ыалдьыттар муһуннулар. Үөрүүлээх тэрээһиҥҥэ тыл этээччилэр «Патриот» — бу ыччат дьиэтэ эрэ буолбакка, эдэр дьон бэйэтин сайыннарарыгар, үөрэнэригэр уонна култууратын, санаатын, бэйэтин бырайыактарын атастаһарыгар аналлаах, элбэх кыахтары биэрэр эко-систиэмэ буоларын бэлиэтээтилэр.

Бу киин Саха сиригэр ыччакка анаммыт саамай улахан, аныгылыы былаһааккалартан биирдэстэринэн буолар. Ыччат киинэ киэҥ араҥаҕа — оскуола оҕолоругар, устудьуоннарга, эдэр исписэлиистэргэ, уопсастыбаннай түмсүүлэр бэрэстэбиитэллэригэр уонна эдэр ыалга ананар.

Ыччат — дойду ис кыаҕа

Киин Дьокуускай куорат 202‑с микро-оройуонугар, «Бригантина» дьиэтигэр 3200 кв. м тахса иэннээх сири ылар. Саха Өрөспүүбүлүкэтин Ыччат дьыалаларын министиэристибэтин чахчытынан, инникитин толору үлэлээн бардаҕына, 120 тыһыынчаттан тахса киһини хабыахтаах. Билиҥҥитэ кииҥҥэ 12 ыччат тэрилтэтэ баар, салгыы өссө кэҥиэхтээх. Салайааччы Сулустан Заболоцкай эппитинэн, билигин уопсастыбаннай тэрилтэлэртэн сайаапкалары хомуйаллар. Саамай элбэх сайаапка киберпространствоҕа киирбит.

«Патриот» ыччат киинэ хас да зонаны холбуур, хас биирдиитэ туспа дьарыкка ананар. Икки этээһинэн айар үлэнэн дьарыктанар устуудьуйалар бааллар: манна уруһуйунан, хаартыскаҕа түһэриинэн, тыйаатыр ускуустубатынан уонна муусуканан дьарыктаныахха сөп. Аныгы тэрил уонна табыгастаах эйгэ айар-тутар санаалары олоххо киллэрэргэ туох баар усулуобуйа тэриллибит. Аныгы үлэ миэстэтин тэрийиигэ, фрилансердарга, ыраахтан үлэлиир дьоҥҥо уонна урбаанньыттарга офис оннугар коворкинг хосторо бааллар. Аны өссө графика устуудьуйата, маастар-кылаастары, сэминээрдэри ыытарга, видеороликтары, биэриилэри, подкастары устарга аныгылыы оборудованиелаах былаһааккалар бааллар.

Кииҥҥэ кэмпириэнс-саала эмиэ баар, онно урбаантан саҕалаан уопсастыбаннай көҕүлээһин тиэмэлэригэр араас сэминээрдэр, лиэксийэлэр уонна эрчиллиилэр ыытыллыахтара. Тренажердардаах успуорт хосторугар уонна бөлөхтөрүнэн эрчиллиилэргэ туспа болҕомто ууруллубут.

Уопсастыбаннай эйгэ

«Патриот» сүрүн соруктарыттан биирдэстэринэн ыччат көхтөөх гражданскай позициятын өйөөһүн буолар. Манна араас интэриэстээх ыччакка кулууптар үлэлиэхтэрэ, онно эдэр дьон уопуттарын уонна идиэйэлэрин атастаһар эрэ буолбакка, бэйэлэрин бырайыактарын саҕалыахтарын сөп. Былааннарыгар волонтерствоны, экология хамсааһынын уонна култуураны сайыннарыыга бырагыраамалары тэрийии баар, олор ыччат куораты сайыннарыытыгар бэйэтин кылаатын киллэрэригэр кыах бэриллиэ.

Үлэ бастакы күнэ

Бастакы күҥҥэ 150‑тан тахса эдэр дьон аһаҕас маастар-кылаастарга уонна успуорт күрэхтэһиилэригэр кыттарга баҕатын биллэрбит. Бүгүҥҥү тэрээһин ураты чаҕылхай эйгэтэ, ыччат мичээрэ уонна дьоллоох сирэйдэрэ бу бырайыак суолтатын уонна билиҥҥи олоххо сөптөөҕүн көрдөрдүлэр. Биһиги бэйэбит олоххо миэстэбитин буларбытыгар уонна идиэйэлэрбитин атыттары кытта үллэстэргэ маннык сир баар буолбутуттан үөрдүбүт диэн ыччат дьон санаатын үллэһиннэ. «Патриот» — бу киин эрэ буолбакка, биһиги улаатар уонна сайдар платформабыт дэһэллэр ыччаттар.

«Патриот» ыччат киинин аһыллыыта Дьокуускай куорат олоҕор улахан суолталаах түгэнинэн буолла, кэлэр өттүгэр эдэр көлүөнэҕэ саҥа кыахтары арыйара саарбаҕа суох. Манна айар дьоҕуру сайыннарарга, бэйэни көрдөрөргө уонна көҕүлээһиннэри олоххо киллэрэргэ усулуобуйалар тэриллиэхтэрэ. Инникитин олоҕу тупсарарга уонна дьон туһугар үлэлииргэ бэлэм буолар көлүөнэни түмэр киин буолуо.