Ыччаты иитии туһунан сокуон барылыгар Саха сирэ бэйэтин этиилэрин киллэрдэ

Кулун тутар 20 күнүгэр Дьокуускайга Госдуума ыччат бэлиитикэтигэр кэмитиэтин көһө сылдьар мунньаҕа буолан ааста, онно ыччаты патриотическай иитиигэ сыһыаннаах сокуоннай аакталары дьүүллэстилэр.

Мунньахха Госдума ыччат бэлиитикэтигэр кэмитиэтин бастайааннай бэрэссэдээтэлэ Артем Метелев, Ил Дархан Айсен Николаев, Ил Түмэн бэрэссэдээтэлэ Алексей Еремеев, ону тэҥэ араас тэрилтэлэр, биэдэмистибэлэр, уопсастыбаннай түмсүүлэр салайааччылара кытыннылар.

“Биһиги патриотическай иитии туһунан сиһилии дьүүллэстибит, бу дойдубут биир сүрүн соруга буолар, — диэтэ Артем Метелев. — Гражданнар бэйэлэрин дойдуларынан, устуоруйатынан, култууратынан киэн туттар, тылынан эрэ буолбакка дьыаланан сайдыыга кыттыһар буоллахтарына, судаарыстыба ситиһиилээх, сайдыылаах буолар. Бүгүн оҕону, ыччаты иитиигэ улахан үлэ оҥоһуллар, уопсастыбаннай хамсааһын бара турар. Элбэх үлэни “Бастакылар хамсааһыннара”, атын да биэдэмистибэлэр ыыталлар. Дьэ бу быһаччы үлэлэһэ сылдьар дьон туох дииллэрий? Бу үлэ синхронизацияҕа наадыйар, чуолкай соруктары, бириинсиптэри туруорар туһугар бу үлэни кимнээх илдьэ сылдьалларын, өйөбүл миэрэлэрин чуолкайдыахха наада”.

Биһиги дойдубутугар төһө ыччат кулууба, түмсүүтэ баарый, ким онно үлэлиирий, үөрэтэрий? Артем Метелев федеральнай таһымҥа итинник испииһэк суох диир. Ордук билиҥҥи кэм ирдэбилинэн бу үлэни бэрээдэктээһин, систиэмэлээһин, көдьүүстээх оҥоруу  олус суолталаах дьыаланан буолбутун бэлиэтиир.

“Байыаннай -патриотическай иитиигэ эргэрбит докумуоннары, уураахтары уларытыахха наада. Билигин атын типовой моделлар, ыстандаартар, патриотическай түмсүүлэр испииһэктэрэ наада, бу үлэни ыытарыгар ыччат дьыалаларыгар федеральнай ааҕыныстыбаны боломуочуйалыахха наада”.

Артем Метелев, патриотическай иитиигэ федеральнай таһымнаах сокуон ылылларыгар Саха өрөспүүбүлүкэтэ көҕүлээһиннээх тахсыбытын чопчулаан бэлиэтээтэ

“Оччоҕо федеральнай таһымҥа уопсай үлэ ханнык хайысханан барара чуолкайданыа, сайдарга усулуобуйа оҥоһуллуо этэ. Дойдубут инники кэскилин федеральнай сокуонунан бөҕөргөтүөхпүт. Оннук сокуон бэлэм, бүгүн ону дьүүллэстибит, бу үлэҕэ уонунан федеральнай биэдэмистибэлэр кыттыһыахтара, паториотическай иитии бу дойдубут барытын эппиэтинэһэ”, — диэтэ Госдума ыччат бэлиитикэтигэр кэмитиэтин бастайааннай бэрэссэдээтэлэ.

Ил Түмэн бэрэссэдээтэлэ Алексей Еремеев, патриотическай иитии олох бары араҥатын, тэрилтэтин, дойду хас биирдии  гражданинын таарыйарын бэлиэтээн эттэ.

“Ол иһин бу боппуруоһу кэлимник көрөн, ыйааһыннаан үлэлиэххэ наада. Биһиги бэйэбит көҕүлээһиммитин оҥорбуппут, биһиэхэ Крым Өрөспүүбүлүкэтиттэн, ДНӨ-тэн кэллиэгэлэрбит кыттыспыттара. Үлэбитин оробуочай көрүҥүнэн Госдума кэмитиэтигэр ыыттыбыт, онно хас да альтернативнай бырайыак баар, биһиги сорукпут диэн олору холбооһун, биир кэлим оҥоруу уонна быйыл Госдумаҕа сокуоннай көҕүлээһин быһыытынан киллэрии”, — диэтэ.

Эрэгийиэннээҕи сайдыы департаменын салайааччыта Глеб Узунов “Муус Устар” бэстибээл чэрчитинэн  ыытыллыбыт сүлүөт үтүө үгэскэ кубулуйарыгар эрэлин биллэрдэ.

“Россия – страна возможностей” бэрэсидьиэн платформата араас хайысхалаах бырайыактары, куонкурустары таһаарар, — диэн санаатын үллэһиннэ. — Манна оскуола оҕотуттан саҕалаан салайар үлэһиккэ тиийэ кыттыахха сөп. Болҕомтобутун ордук куонкуруска кыттыбыт кыттааччыга уурабыт. Куонкурус кыттыылаахтара манна кыттан баран, бэйэлэрин эрэгийиэннэригэр төннөллөр, оччоҕо бу үлэ онно эмиэ салҕанара наада. Биһиги бу үлэни эрэгийиэннээҕи былаастары кытта бииргэ ыытабыт, оччоҕо манна бэйэлэрин эрэгийиэннэригэр туох эрэ саҥаны, уларытыыны киллэрэр дьулуурдаах сэргэх дьон түмсүүтэ баар буолар”.