Үчүгэй нэһилиэгэр баһылыгынан талыллыбыт Тимур Петряков байыаннай дьайыыттан төннөн кэллэ

Өймөкөөн улууһун Үчүгэй нэһилиэгэр былырыын күһүн баһылыгынан талыллыбыт Тимур Петряков бу күннэргэ Сахатын сиригэр төннөн кэллэ.

Кини 2024 сыл от ыйыттан хантараагынан сулууспалаабыта, былырыын дойдутугар уоппускаҕа кэлэ сылдьан баһылыкка туруорунан барбыта. Үчүгэйдэр уолларын өйөөн, баһылыгынан талбыттара.

Байыас дойдутугар кэлбитин Дьокуускай аэропордугар кинини Саха Өрөспүүбүлүкэтин Үбүн министиэристибэтин, Счетнай балаата бэрэстэбиитэллэрэ уонна Өймөкөөн улууһуттан биир дойдулаахтара көрүстүлэр.

Тимур Петряков бу иннинэ 14 сыл СӨ Үбүн министиэристибэтигэр, ол иһигэр тоҕус сыл контролер-ревизор дуоһунаһыгар үлэлээбитэ. Ону таһынан кини хас да сыл СӨ Счетнай балаатаҕа үлэлээбитэ диэн СӨ Үбүн министиэристибэтэ иһитиннэрэр.

«Сулууспатын кэмигэр биһиги кэллиэгэбит хорсун быһыытын иһин үрдүк наҕараадалары ылбыта: «Байыаннай дьайыы кыттыылааҕа», «Бойобуой үтүөлэрин иһин» мэтээллэринэн уонна дойду иннигэр ураты үтүөлэрин иһин судаарыстыбаннай наҕарааданан – «Жуков мэтээлинэн» бэлиэтэммитэ. Киниэхэ биһиги саҥа эппиэтинэстээх дуоһунаһыгар ситиһиилэри баҕарабыт!», — диэн Үп министиэристибэтин үлэһиттэрэ ситиһиини баҕардылар.