Өймөкөөн улууһун оскуолаларын быйыл 49 оҕо үөрэнэн бүтэрдэ. Ити выпускниктартан Үчүгэй орто оскуолатын 4 оҕо бүтэрбитин туһунан Полина Находкина-Победа иһитиннэрдэ:
«Бастакы сиэним оскуоланы бүтэрэн, биһиги аймаҕы барыбытын долгутар түгэн үүннэ. Үчүгэй оскуолатыттан кынаттанан, олох киэҥ аартыгар үктэнэр ыччаттарбытыгар дьолу, ситиһиини, алгыс тылын бастыҥын аныыбыт. Бу үөрүүлээх тэрээһин биир сонун түһүмэҕинэн выпускниктар төрөппүттэрин кытта «Мин таптыыбын оскуолабын!» диэн кэрэ көстүүлээх сиргэ тирэҕирэр бэлэҕи учууталларыгар ууммуттара буолар. Бу оҕо уонна төрөппүт күннээҕи түбүктэрин быыһыгар бииргэ түмсэн дууһаларын ууран туран оҥорбут оҥоһуктара үйэлээх буоллун! Учууталлар бу бэлэхтэн олус долгуйбуттар уонна үөрбүттэр.
Үтүөкэннээх түгэнинэн Үчүгэй орто оскуолатын учууталларын уонна быйыл оскуоланы бүтэрэр оҕолору эҕэрдэлээн туран, мин кинилэргэ бэйэм сэмэй бэлэхпин — хоһооммун ыытабын.
Бүтэһик чуорааммыт чугдаарда,
Хас тэбэр сүрэҕи долгутта!
Оскуола таһыгар муһунна
Долгуйбут учуутал, төрөппүт!
Оскуола боруогун атыллыыр
Оҕолор ураты күннэрэ!
Күннэтэ үөрэххэ угуйбут
Оскуола бүтэһик бу күнэ!
Өймөкөөн Үчүгэй сиригэр
Үөрүүлээх бу күҥҥэ үчүгэй
Бэлэҕи долгуйа туттулар
Оскуола үлэһит дьонноро!
Махталлаах төрөппүт көстүүлээх
Бэлэҕи оҥорон соһуппут!
Дьэ чахчы күннэтэ харахха
Көстүүлээх бэлэҕи оҥорбут!
Бу буолар төрөппүт махтала!
Сүрэҕин сылааһын тиэрдиитэ!
Сайыны, кыһыны эргиччи
Санатыа бүгүҥҥү үөрүүнү!
ПОЛИНА ПОБЕДА.
Сообщить об опечатке
Текст, который будет отправлен нашим редакторам: