Үөдэйгэ 19 ынах төрөөтө

Өрөспүүбүлүкэ Тыатын хаһаайыстыбатын уонна аска-үөлгэ бэлиитикэтин  министиэристибэтин бары көрүҥнээх хаһаайыстыбаларыгар кыстык  бара турар.

Ол курдук, Нам улууһун Үөдэй нэһилиэгэр  кыстык этэҥҥэ ааһан эрэр.  Бу туһунан бэтэринээринэй быраас Римма Эдуардовна Попова маннык кэпсээтэ:

— Быйыл сүөһү, сылгы кыстыгар от да баар уонна тыа хаһаайыстыбатын исписэлииһэ Гуляев Николай Андреевич эбии комбикорм сакаастаан аҕала турар. Ону тэҥэ  олохтоох бэтэринээрдэр уулаах ынахтарга битэмииннээх брикет оҥордубут. Саҥа сылга үктэнэн баран уопсайа 19 ынах төрөөтө. Бу хаартыскаҕа көстөр ньирэй тохсунньу ыйга төрөөбүтэ. Мин искусственнайдык буоһаппыт ынаҕым оҕото. Алексеева Вилена Титовна бааһынай хаһаайыстыбатыгар төрөөбүтэ.

Нэһилиэккэ сылгылары чиптээһин ыытылла турар. Бүгүҥҥү туругунан  уопсайа 210 сылгы чиптэннэ. Бу үлэ кулун тутар ыйга диэри барыахтаах.