Үөдүгэйдэр күүстээх үлэҕэ түһүннүлэр

Саас кэлэн, хаар-муус ууллан, чалбах тахсан, ханна даҕаны моһуоктары үөскэттэ. Үөһээ Бүлүү улууһун Үөдүгэй нэһилиэгин «Үөдүгэй» тэрилтэтин үлэһиттэригэр күүстээх үлэ саҕаланна.

Бу алта киһилээх биригээдэ Үөдүгэй (Андреевскай) дьаһалтатын иһинэн 2022 сыллаахтан тэриллэн,  Арсен Валерьевич Максимов салалтатынан үлэлиир. Биригээдэ сайынын ханааба хаһыытыгар, ойуур баһаарыгар, халтараан кэмигэр суолга кумах кутуутугар үлэлиилэр, онтон даҕаны атын субуотунньуктарга кытталлар. Былырыын күһүн кинилэр анал байыаннай дьайыыларга кытта сылдьар дьон дьиэ кэргэттэригэр муус ылан киллэрбиттэрэ.

Быйыл кыһыны, сааһы быһа сөҥүү түһэн, хаар уута элбэх буолан, намыһах сирдэргэ турар дьиэлэргэ, оҥкучахха, булууска уу киирэн, нэһилиэк уулуссалара уунан туоланнар, ону туоратыыга түүннэри-күнүстэри үлэлии сылдьаллар. Тиэргэҥҥэ киирбит ууну ыыталлар, суол аннынан ааһар турбалар муустарын ириэрэллэр. Кинилэргэ нэһилиэк ыччата көмөҕө тахсан, илии-хары күүһүнэн харса суохтук үлэлии сылдьаллар, айылҕа алдьатыылаах күүһүн кытары охсуһаллар.