Үөдүгэйгэ быыбарга уопсастыбаннай кэтээн көрөөччүлэр үлэлииллэр

Үөһээ Бүлүү улууһун Үөдүгэй нэһилиэгин 80-с №-дээх быыбардыыр учаастагар Арассыыйа Бэрэсидьиэнин быыбара бүгүн үһүс күнүн көхтөөхтүк барар. Бу учаастакка испииһэгинэн барыта 599 быыбардааччы баар.

Бүгүн сарсыарда 9 аҥаар чаастаах көрдөрүүнэн барыта 368 киһи, ол аата 61,44% куоластаан олорор.
Бу үс күн учаастактааҕы быыбар хамыыһыйатын кытары иккилии кэтээн көрөөччү быыбар хаамыытын, чиэһинэйдик ыытылларын кэтиир-маныыр. Итини таһынан быраабы уонна сокуону араҥаччылыыр уорган үлэһитэ бэрээдэги көрөр.

«Бүгүн үһүс күммүтүн Арассыыйа Бэрэсидьиэнин быыбарыгар Үөдүгэй нэһилиэгин 80-с №-дээх быыбардыыр учаастагар кэтээн көрөөччүнэн олоробут. Бу үс күн иһигэр дьон-сэргэ быыбарга көхтөөхтүк кэлэн кытынна. Эдэр даҕаны, орто саастаах даҕаны дьон элбэх, бары үөрэ-көтө кэлэн куоластаатылар. Бүгүн, быыбар сүрүн күнүгэр, сарсыардаттан аҕам саастаах дьон кэлэн куоластыырын бэлиэтии көрдүбүт. Биһиги Уопсастыбаннай балаататтан кэтээччилэр Оксана Степановалыын иккиэбит. Быйыл быыбар тэрээһинэ үчүгэй, үһүс күнүн туох даҕаны быһылаана, кэһиитэ суох, этэҥҥэ ааһан эрэр диэххэ сөп. Учаастак иһигэр уопсай бэрээдэги полиция үлэһитэ Галина Син көрөр. Оттон Үөдүгэй нэһилиэгин 80-с №-дээх быыбардыыр учаастагын өр сылларга үлэлээбит, уопуттаах бэрэссэдээтэлэ Мария Семенова салайар», — диэн Уопсастыбаннай кэтээн көрөөччү Евдокия Николаева кэпсиир.