Үөдүгэйгэ саҥа оҕо былаһаакката тутулунна

Бүгүн Үөһээ Бүлүү улууһун Үөдүгэй сэл.   биир  умнуллубат, бэлиэ күн буолан ааста. Ол курдук  Механизаторскай уулуссаҕа олохтоох көҕүлээһиннэри өйөөһүн бырагырааматынан саҥа тутуллубут оҕо былаһааккатын үөрүүлээх  быһыыга-майгыга арыйдылар.

— Саҥа оҕо былаһааккатын аалай лиэнтэтин Үөдүгэй нэһилиэгин баһылыга Альберт Юрьевич Иванов, бэдэрээтчит, чааһынай урбаанньыт Иван Николаевич Сергеев, бу түөлбэ Дьоруой ийэтэ, үлэ бэтэрээнэ Анна Васильевна Васильева кырыйан, бар дьоннорун эҕэрдэлээтилэр. Чахчы да, оҕо аймах бырааһынньыга, үөрүү-көтүү, оҕо дьоллоох күлүүтэ былаһаакканы толордо. «Сказка» оҕо уһуйаанын уонна Ю.Н. Прокопьев аатынан орто оскуола оҕолоро, бу түөлбэ кырачааннара, Үөдүгэйбит кэнчээри ыччаттара кэлэн бүгүҥҥү үөрүүлээх күҥҥэ оҕо былаһааккатын арыллыытыгар оонньууну,  көрү-нары оройуттан туттулар, бүгүҥҥү күн өрөгөйүн үрдэттилэр, — диэн Үөдүгэй дьаһалтата иһитиннэрдэ.