Үөгэҥҥэ биир күн

Томпо улууһун Кириэс Халдьаайы Үөгэн диэн учаастагар олох күөстүү оргуйар. Кыра дэриэбинэ Далбар хотуттара  байыаннай дьайыыга сулууспалыы сылдьар уолаттарга көмө буолан арааһы тигэллэр, аахсыйа тэрийэллэр. Маны таһынан, бэйэлэрин күүстэринэн дойдуларын кэпсиир түмэл кытта тэриммиттэр.

Үөгэн сүүс киһиэхэ тиийбэт нэһилиэнньэлээх сүүс саастаах дэриэбинэ. 2013 сылтан толору киин ититиигэ холбонон олорор. Оскуолаҕа 20 оҕо үөрэнэр, уһуйааҥҥа 7 оҕо сылдьар. Саҥа ФАП-тар, оскуолаҕа, уһуйааҥҥа өрөмүөн үлэтэ барбыт, сотору хаарбах туруктаах дьиэлэри көһөрүү тосхолунан уопсай дьиэ тутуллара күүтүллэр эбит.
Нэһилиэнньэ көхтөөх олоҕун, киэҥ билиитин тыын тэрилтэтинэн олохтоох бибилэтиэкэ буолар. Бибилэтиэкэ үлэһитэ Татьяна Гоголева «Айтыына» диэн түмсүү тэрийэн үлэлэтэр. Түмсүү далбардара иистэнэллэр, ыллыыллар, үҥкүүлүүллэр, байыаннай дьайыыга араас көмөнү оҥороллор. Кэнники оҕуруонан араас киэргэллэри оҥорон, атыылаан үп киллэрэн көмө буоллулар.

Үөгэн элбэх сүөһүлээх хаһаайыстыбатын хаһаайына — Айаал Кузьмин. Киниэхэ ийэтэ Наталия, дьоно көмө буолаллар. Бу күннэргэ хас да ынахтара төрөөбүт.

Кириэс дьоно үгүһэ икки дьиэлээхтэр. Кыстыыр сирдэрэ атын, сайылыктара эмиэ туспа буолар. Екатерина Кобельянова – төрүттэрин дьиэлэрин өтөхсүппэккэ, Тэтиҥ диэн сиргэ сайылыыр үгэстээх. Сылыйдаҕына көһүөм диэн төрүттэрэ хаалларбыт былыргы тэриллэрин ыскаабы, остуолу көрдөрөн кэрэхсэттэ.

Былыргыны умнубат туһуттан, Үөгэн  оскуола онобулун үйэтитэр сыаллаах, өр кэмҥэ оскуола дириэктэринэн үлэлээбит, учаастак бас-көс киһитэ Алексей Павлов түмэл төрүттээн үлэлэппитэ балтараа сыл буолла. Манна улуус дьаһалтата, Ил Түмэн депутаттара Виктор Лебедев, Алексей Колодезников, Кондрагмет салайааччыта Александр Кычкин көмө буолбуттар.

Үөгэн киэн туттуута – олус түмсүүлээхтэр. Саҥа оскуолаларын көмүөл күүһүнэн тутан силигин ситэрбиттэрэ да элбэҕи кэпсиир.

 

Тускулаана ГОРОХОВА-КОБЕЛЬЯНОВА