Үөһээ Бүлүү булчуттара байыаннай дьайыыга булт аһынан көмөлөһөллөр

Үөһээ Бүлүү Ороһутугар олорор балыксыт Ольганы анал байыаннай дьайыыга сылдьар уолаттарбыт үксүлэрэ билэллэр. Кини  балыктаан, ону астаан, буһаран, ыһаарылаан, хатаран, ыыһаан инники кирбиигэ сылдьар уолаттарга ыытар.

Кэнники аны булт аһын хомуйарга ыҥырыы таһааран,  улуус булчуттара кус, куобах, мас көтөрө, о.д.а. тиксэрдилэр.

Ол курдук, ааспыт нэдиэлэҕэ  Үөһээ Бүлүү кусчуттара 3 куул куһу хомуйаннар АГАТУ-га ыраастата ыыппыттар.  Кустар үргэммиттэрин кэннэ Москваҕа «Саха волонтердара» хамсааһыҥҥа тиийиэҕэ, онтон волонтердар астаан госпиталларга бааһырбыт байыастарга илдьиэхтэрэ.

«Ааспыт сырыыга  саамай элбэх куһу Хоро кусчуттара ыыппыттара. Олохтоохтортон 1,5 куул куһу хомуйан миэхэ тиксэрбиттэрэ. Билигин эмиэ куһу, хааһы, куобаҕы, мас көтөрүн мунньа сылдьабыт. Номнуо 2 куулу хомуйдубут. Бу сырыыга Дүллүкү нэһилиэгин олохтоохторо эмиэ күүскэ мунньа сылдьаллар. Аныгыс нэдиэлэ бүтүүтэ Дьокуускайга АГАТУ-га ыытыахпыт. АГАТУ устудьуоннара ыраастааһыҥҥа, эттээһиҥҥэ улаханнык көмөлөстүлэр. Түгэнинэн туһанан махталбын тиэрдиэм этэ. Устудьуоннар көмөлөһөллөрүн билэн баран, анал байыаннай дьайыыга сылдьар уолаттарбытыгар аһынан көмөнү хомуйуу күүскэ баран эрэр. Бүгүн Ороһуттан Дмитрий Руфов мас көтөрүн, Василий Туралысов икки куобаҕы кытары күһүҥҥү кустарын, байыаннай дьайыы бэтэрээнэ Александр Семенов 20-ттэн тахсак куһу аҕалан биэрдилэр. Онон үлэ күүскэ барар. Уолаттарбыт Кыайыы көтөллөөх эргиллэн кэлиэхтэрэ диэн эрэнэбит», — диэн Ольга Захарова-Балыксыт Ольга кэпсээтэ.