Үөһээ Бүлүү Далырын оскуолата саҥа массыына күлүүһүн тутта

Муус устар 28 күнүгэр Саха Өрөспүүбүлүкэтин Ил Дархана Айсен Николаев өрөспүүбүлүкэ оскуолаларыгар саҥа көлө күлүүстэрин туттарбыта.

Ил Дархан илиититтэн массыына күлүүһүн Далыр орто оскуолатын  дириэктэрэ  Михаил  Семенов туппута. Бу туһунан бэйэтин телеграм-ханаалыгар Үөһээ Бүлүү улууһун баһылыга Валерий Николаев сырдатта:

«Былырыын, 2024 сылга, Ороһу орто оскуолата саҥа оптуобус күлүүһүн Ил Дархантан туппута. Дойду Бэрэсидьиэнэ Владимир Путин өйөбүлүнэн 2016 сылтан оскуолаларга оптуобустар көрүллэллэр. Кэлиҥҥи биэс сыл иһигэр Саха сирин үрдүнэн 212 оскуолаҕа саҥа көлө бэрилиннэ. Бу бырагыраамма салгыы үлэлиирин туһунан Ил Дархан иһитиннэрдэ. Айсен Сергеевичка өйөбүлгүт иһин истиҥник махтанабыт«.