Үөһээ Бүлүү дэлэгээссийэтэ байыастарга 59 аадырыстаах баһыылканы тириэртэ

Бу күннэргэ Үөһээ Бүлүү улууһун дэлэгээссийэтэ анал байыаннай дьайыы зонатыгар, Донецкай Норуодунай Өрөспүүбүлүкэҕэ сылдьан, 16 байыаһы кытта көрүстэ уонна кинилэргэ 27 аадырыстаах баһыылканы тиксэрдэ.

«Донецкайга сулууспалыы сылдьар биир дойдулаах байыас уолаттарбыт Үөһээ Бүлүү улууһун бар дьонугар күүстээх көмө, өйөбүл иһин истиҥ махталларын тиэрдэллэр. Уолаттарбыт дойдуларын сонунун истэн, кэпсэтэн, кэһии тутан, күннээҕи сэрии олоҕуттан кыратык аралдьыйан сэргэхсийдилэр, күүстэригэр күүс эбиннилэр. Байыастарбыт, уолаттарбыт, этэҥҥэ сылдьыҥ! Дойдугут тыына харыстаатын, кыайыылаах эргиллин!», — диэн Үөһээ Бүлүү улууһун баһылыга Валерий Николаев ТГ-ханаалыгар суруйар.

Үөһээ Бүлүүттэн сылдьар байыастар үгүстэрэ Запорожье уонна Донецкай хайысхаларыгар сулууспалыыллар. Дэлэгээссийэ уопсайа 59 аадырыстаах баһыылканы тириэрдэн, анал байыаннай дьайыы зонатыгар үлэтин түмүктээн төнүннэ. Оттон улуустааҕы Биир кэлим диспетчерскэй сулууспа салайааччыта Егор Дмитриев салгыы Курскай, Белгород, Луганскай хайысхаларынан үлэтинэн сылдьар.