Салгыы
Үөһээ Бүлүү дьокутааттара «балбаах» сокуонун утараллар

Үөһээ Бүлүү дьокутааттара «балбаах» сокуонун утараллар

05.03.2023, 13:22
Спиридон Борбуев хаартыската
Бөлөххө киир:

Кулун тутар 3 күнүгэр, Үөһээ Бүлүү улууһун дьокутааттара «балбаах» уонна «бөх» сокуоннарын саха тыатын дьонугар сөбө суох диэн утаран, 100% норуот аатыттан куоластаан Ил Түмэн үлэлэһэригэр этии ыытарга быһаардылар. Докумуоҥҥа улуустааҕы дьокутааттар сэбиэттэрин бэрэссэдээтэлэ Н.Н. Николаев уонна улуус баһылыга В.С.Поскачин илии баттаатылар.

Үөһээ Бүлүү дьокутааттара  аан дойду дьалхааныгар оҕустарбакка, бэйэбит испитигэр бэрээдэги олохтуурбут буоллар диэн баҕа санаалаахтар. Дьокутааттар үс сокуоҥҥа бэйэлэрин көрүүлэрин, тыа сирин дьонугар табыгаһа суоҕун быһааран суруйаллар.

Бастакытынан,  «Сүөһүгэ, кыылга эппиэтинэстээх сыһыан туһунан» 2018 с. ахсынньы 27 күнүгэр ылыныллыбыт сокуон. Түөрт атахтаах икки атахтаахтан ордуктук тутуллар, көрүллэр, харыстанар сокуона буолбутун, өрөспүүбүлүкэ үрдүнэн олус элбэх киһи ыкка ытыттаран эчэйэн, доруобуйатыгар охсууну ыларын, ону ааһан ыт үөрэ саба түһэн өлүү түбэлтэлэрэ да тахсарын этэллэр. Бу ыттарбытыттан саҕалаан, торҕон бөрөлөрбүтүн, эһэлэрбитин «айылҕа сокуонунан» бэрэдэктиир кыахпытын быһан, илиибитин-атахпытын баайбыт дьаһаллара буолар.

Иккиһинэн,  «Оҥорон таһаарыы уонна туһаныы тобоҕун харайыы туһунан» 1998 с.  кулун тутар 24 күнүгэр ылыныллыбыт сокуон. Элбэх киһи, тыа сиригэр, хомуллубат бөххө эбэтэр сылга биирдэ сыбаалкаҕа бэйэбит быраҕар бөхпүтүгэр тоҕо ый аайы киһи ахсаанынан төлүүбүтүй диэн үөһээ бүлүүлэр этинэллэр. Кырдьык, элбэх оҕолоох, кыра дохуоттаах, сүөһүнү эрэ ииттэн олорор ыалга бу олус охсуулаах сокуон. Билигин бөҕү суортуур анал полигоннар суохтарыттан үлэ ситэри барбат дииллэр, ол эрээри бары ый аайы төлөбүрү киһи ахсаанынан төлүү олоробут.

 

Үсүһүнэн, быйыл улахан дьиксиниини таһаарбыт, бу ыйга саҥа күүһүгэр киирбит, «Сүөһүнү иитии ойоҕос бородуукталарын уонна РФ чопчу сокуоннай аакталарыгар уларытыылары киллэрии тустарынан туһунан» сокуон, ол эбэтэр норуокка биллэринэн, «балбаах сокуона» буолар. Бу сокуон сүөһү-сылгы ииттинэн олорор тыа сирин дьонугар-сэргэтигэр охсуулаах буоларын, бары да өйдүүбүт. Аҕыс ый томороон тымныылаах тыйыс дойдуга олорон, күн аайы ноһуому тустаах сиргэ илдьэн сүөкүүр, манан аҕай дьыала буолбатах. Онтон аны мунньан баран таһыам диэтэххэ, ыстарааба сыттаҕа. Оччотугар бэйэлэрэ да нэһиилэ олорор тыа дьоно барахсаттар ыстараапка устуохтара суоҕа дуо?

Дьэ, ол иһин, Үөһээ Бүлүү дьокутааттара, салалтата, норуот талбыт дьокутааттарыгар ити ылыллыбыт сокуоннар биһиги тыйыс усулуобуйалаах Сахабыт сиригэр табыгаһа суохтарынан, тохтотор, уларыттарар дьаһаллары көҕүлүүллэригэр туруорсаллар.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
1 октября
  • -4°C
  • Ощущается: -7°Влажность: 68% Скорость ветра: 2 м/с

Сообщить об опечатке

Текст, который будет отправлен нашим редакторам: