Үөһээ Бүлүү Өргүөт нэһилиэгэр ойууру уоттаабыт буруйдааҕы буллулар

Үөһээ Бүлүү улууһугар олохтоох киһи ойуур баһаара тахсыытыгар буруйдааһыҥҥа холуобунай дьыалата суут көрүүтүгэр ыытылынна. Бу туһунан СӨ Борокуратууратын  пресс-сулууспата иһитиннэрдэ.

Силиэстийэлиир чахчыларынан, бу сыл бэс ыйыгар Өргүөт нэһилиэгиттэн чугас эр киһи балыктыы сылдьан кутаа уоту оттубут уонна ойууру уоттаабыт. Ити кэмҥэ кини ойуур баһаара тахсарыгар куттал суох буолуутугар тугу да тэрийэн ыыппатаҕа уонна күн-дьыл кэмин кэтээн көрөн, болҕомтоҕо ылбатаҕа чуолкайданна. Ол түмүгэр ойуур баһаара турбут. Уоттан 33 гектар иэннээх ойуур пуондатыгар 600 тыһ. солк. суумаҕа хоромньу тахсыбыта сыаналанна. Эр киһи хоромньу сууматын толору кээмэйинэн төлөөтө. Ол да буоллар, кини РФ Холуобунай Кодексынан уоту сэрэҕэ суохтук туттуу түмүгэр буруйу оҥорууга буруйданна.