Үөһээ Бүлүү Харбалааҕар күргүөмнээх субуотунньук

Үлэ, Эйэ, Күөх Маай күнүгэр Үөһээ Бүлүү улууһун Харбалаах нэһилиэгин олохтоохторо баһаарынай минерализованнай балаһа кэҥэтиитигэр уонна ыраастааһыныгар көхтөөх субуотунньукка таҕыстылар.

Үлэҕэ уопсайа 5 тиэхиньикэ, 60-ча киһи нэһилиэк хоту өттүгэр, саамай бүтэй ойуурдаах сирин солоон ыраастаатылар. Саҥа оскуола тутуллуохтаах сирин таһынан ойуур баһаарыттан харыстыыр аналлаах балаһа баар буолла, диэн «Үөһээ Бүлүү» хаһыат ТГ-ханаала суруйар.

Ити курдук, баһаары бохсууга анаммыт 123 №-дээх федеральнай сокуон чэрчитинэн ирдэбил быһыытынан   нэһилиэккэ ойуур баһаарыттан сэрэтэр минерализованнай балаһа баар буолла. Ойуур баһаара нэһилиэнньэлээх пууҥҥа суоһуур түгэнигэр аһаҕас уоту бохсор инниттэн минерализованнай балаһа олус суолталаах.