Үөһээ Бүлүү Харбалааҕар ураты быыстапка буолла (видео)

Үөһээ Бүлүү Харбалааҕар быыбары көрсө бу күннэргэ нэһилиэктээҕи сынньалаҥ киинигэр ураты быыстапканы арыйдылар.

Бу кумааҕыны быһан ойуу түһэрэр ньыманан оҥоһуллубут хартыыналар ааптардара Муксуун аҕа ууһуттан силистээх Муксунов Алексей Петрович уонна ыал ийэтэ Анна Афанасьевна 10 оҕолоруттан биирдэстэрэ Муксунов Петр Алексеевич. Дьоно-сэргэтэ ааттыылларынан Бүөчүккэ буолар.
Бүөчүккэ элбэх кыыс оҕо кэнниттэн төрөөбүт кэтэһиилээх уол буолан аҕа уола этэ. Ыал аҕата Алексей Петрович үйэтигэр тыраахтартан түспэтэх. Барахов аатынан сопхуос отделениетын биир сүрүн мэхэньисээтэрэ этэ. Хаһан да кыыһырары билбэтэх, сытыары, сымнаҕас Өлүөскэ киэһэ үлэтиттэн дьиэтигэр киирдэ да, Бүөчүккэтинээн көтөхсөн олорон сыллаһан ахтылҕаннарын таһаараллара. Ыал ийэтэ Ааныска олох эдэригэр хомолтолоохтук күн сириттэн күрэммитэ. Онон ыал аҕата сии кырбас оҕолорун балта Шура көмөтүнэн атахтарыгар туруортаабыта.

Бүөчүккэ бу сөбүлүүр дьарыгын түмүктэрэ кумааҕынан кырыйыы графикатын (силуэтное вырезание из бумаги) ньыматынан оҥоһуллан тахсыбыт хартыыналар. Маннык ньыма дьоппуон омукка киригами диэн ааттанар.
Бэрт элбэх хартыына ыйаммыт. Манна, түүлэрэ илэ көстөр курдук нарыланан быһыллыбыт араас кыыллары, эҥкилэ суох кырыллыбыт нарын линияларынан билэр дьонуҥ, дьоруойдарыҥ уобарастарын көрөҕүн. Манна бааллар Джекки Чан, Виктор Цой,
Джонни Депп, Брюс Ли уо.д.а.

Бу хартыыналарын Бүөчүккэ Эбээн Бытантайга кыстаабыт уһун кыһыннарыгар оҥортообут. (Бииргэ төрөөбүттэриттэн Нина диэн эдьиийэ наһаа үчүгэйдик уиуһуйдуура. Кини кумааҕы куукулалары кырыйан, араас таҥас эгэлгэтин уруһуйдаан, кырыйан кыра кыргыттарга бэлэхтээн үөрдэрэ. Үксүн Барби курдук муода сурунаалын кыргыттарын оҥороро.)
Бу ураты быыстапканы көрбүт эрэ бары сэҥээрэн, сөҕөн-махтайан, Бүөчүккэҕэ инникитин саха норуотун чулууларын, биир дойдулаахтарын дьүһүннэрин оҥорон үөрдэрэ буоллар диэн баҕс, санааларын эттилэр.

Светлана Копыленко.

Хаартыскаларга Александр Копыленко түһэриитэ