Үөһээ Бүлүү иниспиэктэрдэрэ Бүлүү өрүһүнэн айанныырга сэрэтэр үлэни ыыталлар

Үөһээ Бүлүү улууһун судаарыстыбаннай экологическай кэтээн көрүү иниспиэксийэтэ ЫБММ ГИМС иниспиэктэрдэрин кытары бииргэ «Куттала суох муус» аахсыйа чэрчитинэн массыыналар муус алдьанан түһүүлэрэ тахсыбатын, дьон олоҕор-дьаһаҕар, доруобуйатыгар, айылҕаҕа уонна уу эбийиэктэригэр куттал суох буолуутун, хоромньу тахсыбатын туһуттан сэрэтэр үлэни ыыталлар.

Эрийэдэ кэмигэр иниспиэктэрдэр суоппардары кытта  кэпсэттилэр, мууска куттал суох буолуутун тутуһуу ирдэбиллэрин туһунан, муус алдьанан ууга түстэххэ көмөнү оҥорорго сүбэлэрдээх листовкалары тарҕаттылар.

Бэлиэтээн эттэххэ, Бүлүү өрүһүнэн мууһунан айан суола Үөһээ Бүлүү улууһун баһылыгын дьаһалынан сэтинньи 12 күнүгэр аһыллыбыта. Билигин муус ситэ халыҥыы илик буолан, сырыы 4 туоннаҕа эрэ диэри ыйааһыннаах массыыналарга эрэ көҥүллэнэр.