Үөһээ Бүлүү: Намнар үгүс боппуруоһу туруорустулар

Өрөспүүбүлүкэ ситэриилээх былааһын 2023 сыллааҕы түмүгүнэн отчуота, бүгүн, олунньу 6 күнүн, иккис аҥаарыгар Үөһээ Бүлүү улууһун Нам нэһилиэгэр салҕанар. Нам нэһилиэгэ улуус кииниттэн 15 км тэйиччи сытар, 3000 кэриҥэ киһи олорор.

Бүгүн ситэриилээх былаас уорганнарын отчуотугар элбэх киһи муһунна. Бөлөҕү салайан илдьэ сылдьар өрөспүүбүлүкэ экэниэмикэтин миниистирэ Петр Попов Саха сирин социальнай-экэнэмиичэскэй сайдыытын, ааспыт сыллааҕы үлэ-хамнас ситиһиитин туһунан кэпсээтэ.
Саҥа талыллыбыт Үөһээ Бүлүү улууһун баһылыга Валерий Николаев кинини итэҕэйэн, куоластаан талбыттарынан мустубут дьоҥҥо махталын эттэ, инникитин улуус олохтоохторун эрэллэрин толоруоҕун эттэ.
Салгыы мунньах хаамыытын быһааран, регламент олохтоон тута кэпсэтиигэ киирдилэр.
Бастакынан П.Тобуруокап  аатынан түмэл салайааччыта Иван Чычахов гаас киириитин, биэрэги бөҕөргөтүүнү, Элбэх өҥөнү оҥорор киини туттарары туруоруста.
ОДьКХ оператора Гаврил Тартакинов орто хамнас уонна олох-дьаһах өҥөтүгэр чэпчэтиинэн туһаныы туһунан ыйытта. Кини кыра хамнастаах, устудьуон оҕолордоох, дьиэттэн тахсар кыаҕа суох инбэлиит кэргэннээх киһи эрээри, олох-дьаһах өҥөтүгэр, биир кэлим босуобуйаҕа тоҕо хапсыбатын туруоруста. Кини кыһалҕатын улуус социальнай харыстабылын үлэһитэ быһаарарыгар ыйылынна.
Үөрэҕирии бэтэрээнэ Светлана Мегежекская хаарбах дьиэттэн көһөрүү бырагырааматынан учууталлар олорор уопсай дьиэлэрин көһөрүү уонна трасса кытыытыгар сырдатыы боппуруоһун быһаарарга көрдөстө.
Оҕо уһуйаанын сэбиэдиссэйэ Айталина Ильина төһө эмэ бырайыага баарын үрдүнэн уһуйаан тутуллара биллибэтин, тыа сиригэр иитээччилэр хамнастара кыратын эттэ.
Нэһилиэк землеустроителэ Айаал Дмитриев нэһилиэнньэ кэҥиир сирэ суоҕун, элбэх оҕолоох ыалга бэриллиэхтээх өссө 62 сири хантан даҕаны ылан биэрэр кыах суоҕун, элбэх нэһилиэк маннык кыһалҕалааҕын этиннэ.
Мириа Абрахова сибээс өҥөтүн, уот энергиятын, гааһы туһаныы сыаналара тоҕо  үрдүү туралларын, ону былаас тоҕо бэрээдэктээбэтин ыйытта. Нам нэһилиэгэ улуус кииниттэн чугас сытар, ол гынан баран тоҕо оптуобус сылдьыбатый диэн, бэйэлэрэ тиэхиньикэтэ суох дьон кыһалҕаны көрсөллөрүн, дьон туһугар кыһалларын эттэ. Онуоха улуус баһылыга муниципальнай оптуобус сүүрүөҕүн эттэ.
Култуура дьиэтин дириэктэрэ Розалина Бурнашова тэрилтэтэ миэбэлэ суох турарын, онно көмө наадатын туруоруста.
Тэрээһин түмүгэр үөрүүлээх быһыыга-майгыга биэс оҕолоох икки ыалга — Мария Григорьева уонна Татьяна Карташоваҕа олорор дьиэни атыылаһалларыгар сертификаттары туттардылар.
Нам нэһилиэгин уһуйаанын иитээччитэ Зоя Чулуковаҕа үтүө суобастаах, өр сыллаах үлэтин иһин Үөрэх министиэристибэтин аатыттан Махтал суругу туттардылар.
Нам олохтоохторо өрө көтөҕүллэн туран ытыс тыаһынан доҕуһуоллатан Бырабыыталыстыба бу сыллааҕы нэһилиэнньэҕэ отчуотун туйгун үлэлээҕинэн сыаналаатылар.