Үөһээ Бүлүү оҕолорун ойуулуга Арассыыйа таһымыгар тахсар

Үөһээ Бүлүү улууһун «Тускул» оҕо айымньытын киинин иһинэн үлэлиир ойуулук оҥоруутунан дьарыктанар «Саҥа Step» куруһуок оҕолоро ойуулук оҥорон өрөспүүбүлүкэтээҕи уонна Арассыыйатааҕы куонкурустарга ситиһиилээхтик кытталлар.

Куруһуок салайааччыта Анна Григорьева «Тускул» киин иитиллээччилэрин таһынан өрөспүүбүлүкэ атын улуустарын оҕолорун уопут атастаһан эмиэ дьарыктыыр. Соторутааҕыта
куйаар ситиминэн Санкт-Петербурга ыытыллыбыт компьютернай анимация күрэҕигэр кини дьарыктыыр оҕолоро эмиэ ситиһиилээхтик кытыннылар. Кинилэр «Победа длиною в жизнь» диэн ойуулуктарынан бастакы түһүмэҕи ааспыттар.

Иккис түһүмэххэ туох-баар дьоҕурдарын ууран, уустук анимацияны оҥорон ситиһиилээхтик кытыннылар.

Оҕолор ойуулугу хайдах оҥорбуттарын кэпсээн, дьүүллүүр сүбэ чилиэннэрин сөхтөрбүттэр. Маннык дойду таһымыгар ситиһии сыралаах үлэттэн кэлэр.
Улуу Кыайыы 80 сылын көрсө айыллыбыт «Победа длиною в жизнь» диэн ойуулугу 8-с кылаас үөрэнээччитэ Кононов Эрчим, 5 -с кылаас үөрэнээччилэрэ Иванова Алина, Прокопьева Амелия, Николаева Сахайаана, Михайлова Аина, 1-кы кылаас үөрэнээччитэ Васильева Юлиана оҥорбуттар.

Оттон бу күннэргэ «Саҥа Step» куруһуок салайааччыта Анна Григорьева Өрөспүүбүлүкэ күнүгэр анаан Кэнтик уһуйааннарыгар маастар-кылаас ыытта. Уһуйаан иитиллээччилэрэ саҥа технологиялары туһанан ойуулук оҥордулар, графиканы туһанан хамсатан көрдүлэр. Иитиллээччилэр оҕолору дьарыктыылларын курдук анал бырагырааманы туруоран, өссө хантан ыларга сүбэ биэрдэ.

Уһуйаан иитээччилэрэ маннык ойуулук оҥорор интэриэһинэй эбит диэн сэргээтилэр. Кырачааннар эмиэ олус сэҥээрдилэр.

«Иитээччилэр да, оҕолор да олус сэргээтилэр. Маннык хабааннаах уустук оҥоһугу, дьарыктыыр оҕолорум үлэлэрин көрдөрдүм. Ол курдук Саха сирин биллиилээх дьонун — И.Бараховы, П.Тобуруокабы, Николай Якутскайы оҥорбуттарын сөҕө-махтайа көрдүлэр. Бу ойуулугу өссө хамсатыахпыт диэн сылдьабыт. Түгэнинэн туһанан, уһуйаан сэбиэдиссэйигэр Саргылаана Михайловнаҕа уонна иитээччи Лия Альбертовнаҕа маннык тэрээһиҥҥэ көхтөөхтүк кыттыбыттарыгар махтаныахпын баҕарабын. Бу ойуулук Санкт-Петербург куоракка буолбут компьютернай анимация куонкуруһугар 2-с миэстэни ылбыта», — диэн Анна Григорьева санаатын үллэһиннэ.

Хаартыскалары А.П.Григорьева тиксэрдэ