Үөһээ Бүлүү олохтоохторо Дьокуускай баһылыгар, дьокутааттарга, полиция начальнигар анаан аһаҕас сурук ыыттылар

Үөһээ Бүлүү олохтоохторо Дьокуускай баһылыгар, дьокутааттарга, полиция начальнигар анаан аһаҕас сурук ыыттылар

15.01.2023, 12:17
Бөлөххө киир:

Дьокуускай куорат мэрэ Е.Н. Григорьевка, Дьокуускай куорат полициятын начальнига М.А. Кондаковка,
Ил Түмэн уонна Дьокуускай куорат Дууматын дьокутааттарыгар, Саха сирин бары олохтоохторугар!

Саҥа 2023 сылы көрсөр бырааһынньык кэмигэр, киин куораппытыгар, түүҥҥү кулуупка киһи өйүгэр баппат, быдьар ис хоһоонноох биидийэни (видеоны) устан бассаап бөлөхтөрүгэр тарҕаттылар. Биидийэҕэ аҥаардас турууһуктаах эрэ хара тириилээх омук киһитэ, имэҥнээхтик үҥкүүлүү-үҥкүүлүү, көрөөччүлэртэн дьахталлары ыҥыртаан таһаартыы-таһаартыы, эр киһи дьахтары кытары кыыллыы иссиилэрин (половой акт) үтүктэн көрдөрөр. Бу биһиги, Саха сирин олохтоох омуктарын, сиэрбитин-майгыбытын, моральнай-этическэй нуормаларын барытын кэһэр кэрээнэ суох, сааттаах быһыы.
Содур быһыыны, чэпчэки сыһыаны тарҕатар (пропагандалыыр) биидийэ Саха сирин үрдүнэн тарҕанан, бар дьону улаханнык соһутта уонна кэлэттэ. Маннык кэрээнэ суох быһыыланыыттан олохтоох дьон суут-сокуон, былаас өттүнэн туох да көмүскэлэ суохпутун көрдөрөн барыбытын дьиксиннэрдэ.
Бу курдук сааттаах дьаабыланыыны көрө-көрө көрбөтөҕө буолан, таах олорон биэрдэхпитинэ, сарсын содур быһыы-майгы бары көрүҥэ, ол иһигэр сокуонунан бобуулаах проституция, куораттарбытыгар, улуустарбытыгар тарҕанан барыа суоҕа дуо?
Ытыктабыллаах Евгений Николаевич!
Бассаапка тарҕаммыт биидийэлэргэ көстөр быһыы-майгы Дьокуускай куорат ханнык эрэстэрээнигэр, түүҥҥү кулуубугар, хаһан буолбутай? Ким диэн ааттаах-суоллаах, хайа дойду гражданина бүтүн Саха сирин аймаата?
Ытыктабыллаах Михаил Алексеевич!
Бассаапка тарҕаммыт биидийэҕэ көстөр быһыыга-майгыга правовой сыанабыл оҥороргутугар этии киллэрэбит.
Ытыктабыллаах Ил Түмэн уонна Дьокуускай куорат Дууматын дьокутааттара!
Ил Түмэн уонна гордуума иһинэн хамыыһыйа тэрийэн эрэстэрээннэргэ, түүҥҥү кулууптарга маннык содур быһыы-майгы тахсарын хааччахтыыр суоллары тобуларгытыгар ыҥырабыт.
Күндү биир дойдулаахтарбыт!
Өрөспүүбүлүкэбитин салайан олорор ытык дьоммут!
Араас уопсастыбаннай, ол иһигэр Айыы итэҕэлин тарҕатыыга үлэлиир түмсүүлэр кыттыылаахтара!
Оҕолорбут сарсыҥҥыларын өйдүүр-саныыр эбит буоллахпытына, маннык быһыыны таах хаалларан кэбиһимиэҕиҥ!
Ол туһуттан:
— биидийэнэн тарҕаммыт содур майгы, кэрээнэ суох быһыыланыы биһиги сынньанар уопсастыбаннай уораҕайдарбытыгар өтөн киирбэтин ситиһиэххэйиҥ;
— Саха сирин хас биирдии олохтооҕо маннык атаҕастабылтан көмүскэллээх буоларын олохтуур дьаһаллаах буолуоҕуҥ;
— ыччаппытыгар содур майгы сыстыбатын туһугар, айыы сиэригэр сыһыарар иитэр үлэни утумнаахтык ыытары күүһүрдүөҕүҥ;
— Саха сирэ сайдар саҕахтарын, сарсыҥҥы кэскилин туһугар, бары биир киһи курдук турунуоҕуҥ!
Биһиги күүспүт – түмсүүгэ!

Үөһээ Бүлүү улууһун олохтоохторо:
1. Макаров Б.С. — Үөдүгэй нэһилиэгэ, үлэ бэтэрээнэ, биэнсийэлээх, Россия уопсай үөрэхтээһинин бочуоттаах үлэһитэ, Учууталлар учууталлара;
2. Баппаҕай Уола Дьулусхаан Баппаҕай – Үөһээ Бүлүү нэһилиэгэ, Ю.Н. Прокопьев аатынан Үөһээ Бүлүү орто оскуолатын оҕону эбии дьарыктааһын педагога, “Бүлүү регионун Сыл учуутала – 1993” “Саха сирин сыл учуутала – 1996” кыайыылаахтара, “Pelican Deili – 1997” бүтүн Арассыыйатааҕы куонкуруска үс миэстэ иһигэр киирбит учуутал, Тамалакаан нэһилиэгин ытык олохтооҕо;
3. Данилова Т.А. – Үөһээ Бүлүү нэһилиэгэ, Д.С. Спиридонов аатынан Үөһээ Бүлүү 4-с №-дээх орто оскуолатын оҕолор хамсааһыннарын тэрийээччи, Арассыыйа уопсай үөрэхтээһинин бочуоттаах үлэһитэ, Саха Өрөспүүбүлүкэтин үөрэҕириитин туйгуна;
4. Захарова Г.А. – Үөһээ Бүлүү нэһилиэгэ, М.А. Алексеев аатынан өрөспүүбүлүкэтээҕи лисиэй интэринээтин сэбиэдиссэйэ, Арассыыйа оҕону, ыччаты иитии эйгэтин бочуоттаах үлэһитэ, Саха Өрөспүүбүлүкэтин үөрэҕириитин туйгуна, Аан дойдутааҕы “Азия оҕолоро” оҕо пуондатын стипендиата;
5. Иванова Е.С. – Кэнтик нэһилиэгэ, биэнсийэлээх;
6. Кынатов Ю.В. – Үөдүгэй нэһилиэгэ, Саха Өрөспүүбүлүкэтин үөрэҕин үтүөлээх үлэһитэ, Саха сирин “Сыл учуутала” кулууп салайааччыта;
7. Лазарева Р.З. – Үөһээ Бүлүү нэһилиэгэ, биэнсийэлээх;
8. Мыкытыа Дьаакыбылап – Үөдүгэй нэһилиэгэ, Ю.Н. Прокопьев аатынан Үөһээ Бүлүү орто оскуолатын охраннига;
9. Тимофеев Е.Е. – Дьокуускай куорат, биэнсийэлээх;
10. Тимофеев А.С. – Оҥхой нэһилиэгэ, биэнсийэлээх, Саха Өрөспүүбүлүкэтин үөрэҕириитин туйгуна;
11. Софронова К.Г. – Үөһээ Бүлүү нэһилиэгэ, участковай медсестра, Саха Өрөспүүбүлүкэтин доруобуйатын харыстабылын туйгуна;
12. Ульянова А.С. – Үөдүгэй нэһилиэгэ, биэнсийэлээх.

Лента
Салгыы
29 января
  • -49°C
  • Ощущается: -49°Влажность: 62% Скорость ветра: 0 м/с

Сообщить об опечатке

Текст, который будет отправлен нашим редакторам: