Үөһээ Бүлүү сэлиэнньэтигэр “Күөх Чэппиэргэ” көҕөрдүү ыытылынна

Бэҕэһээ Үөһээ Бүлүү сэлиэнньэтигэр Саха Өрөспүүбүлүкэтин Судаарыстыбаннаһын күнүгэр анаммыт “Күөх Чэппиэр” өрөспүүбүлүкэтээҕи экологическай аахсыйа чэрчитинэн СӨ Экологияҕа министиэристибэтин улуустааҕы иниспиэксийэтин үлэһиттэрэ биллиилээх бэлитиичэскэй диэйэтэл И.Н. Барахов аатынан болуоссакка 80 маһы, ол иһигэр  харыйаны, хатыҥы, долохунаны, сарбынньаҕы уонна кедры олортулар.

Исписэлиистэр бэлиэтээбиттэринэн, күһүн  маһы олордууга саамай табыгастаах кэм, ол эрээри ону көрүү-харайыы сүрүн үлэтэ саас уонна сайын буолар.

Ону таһынан  аахсыйа чэрчитинэн улуус киинин араас муннуктарыгар уонна Үөһээ Бүлүү сэлиэнньэтин уопсастыбаннай сирдэригэр тэрилтэлэр мас олортулар диэн СӨ Экологияҕа министиэристибэтэ иһитиннэрэр.

Бу үлэлэри тэрийиигэ «Үөһээ Бүлүү сэлиэнньэтэ» муниципальнай тэриллии баһылыга “Күөх Чэппиэр” аахсыйаны ыытыы туһунан дьаһала тахсыбыта. Онно көҕөрдүү ыытыллар сирдэрэ бэлиэтэммиттэрэ уонна олордуллубут маһы көрүү-харайыы тэрилтэлэргэ сүктэриллибитэ.