Үөһээ Бүлүү улууһугар баһаартан сэрэхтээх буолууну күүһүрдэллэр

Дьон олорор дьиэлэригэр баһаартан куттал суох буолуутун хааччыйар кэлим былаанын олоххо киллэрии чэрчитинэн, Үөһээ Бүлүү улууһун Далыр нэһилиэгин Дьоҕус баһаарынай чааһын үлэһиттэрэ, Далыр нэһилиэгин МПТК-н чилиэннэрин кытта, дьиэлэргэ урут туруоруллубут автономнай биллэрэр тэриллэри (АДПИ) бэрэбиэркэлээтилэр.

Ураты болҕомтону нэһилиэнньэ кыаммат араҥатыгар, кырдьаҕастарга уурулунна диэн СӨ Судаарыстыбаннай баһаарынай сулууспата иһитиннэрэр. Идэлээх үлэһиттэр тэриллэри бэрэбиэркэлээтилэр, батарейкаларын уларыттылар уонна АДПИ-ны хайдах туттарга ыйан-кэрдэн биэрдилэр.

Ону таһынан, рейдэ кэмигэр элбэх оҕолоох ыаллар, соҕотох олорор дьон уонна атын социальнай өттүнэн көмүскэлгэ наадыйар дьоҥҥо саҥа АДПИ-лары туруордулар.