Үөһээ Бүлүүгэ Бүлүү өрүскэ ньиэп тохтуута бэлиэтэннэ

Бэс ыйын 21-тэн 22-с түүнүгэр Үөһээ Бүлүү улууһугар Бүлүү өрүскэ ньиэп  тохтуута бэлиэтэннэ.

Олохтоохтор дизельнэй уматык  сыта кэлэрин туһунан иһитиннэрбиттэр. Росприроднадзор, ЫБМ уонна олохтоох сулууспалар кыттыгас бэрэбиэркэлэрин түмүгүнэн, ньиэп Булгунньахтаах сэлиэнньэтиттэн саҕалаан Хомустаахха диэри уонна салгыы сүүрүк устун аллараа тарҕанар. Өрүс үрдүнэн 3-тэн 15 миэтэрэҕэ диэри кэтиттээх ньиэп тарҕаммыта быһаарылынна.

Билиҥҥи туругунан, ньиэп хантан тохтубута быһаарылла илик, көрдүүр үлэлэр ыытыллаллар. Салгыы сэрэтии үлэнэн өрүстэн ууну хачайдааһын тохтотулунна.

Улуус дьаһалтата балаһыанньаны кэтээн көрөр. «Олохтоохтортон сэрэхтээх буоларгытыгар уонна киртитии туһунан ханнык баҕарар саҥа чахчы билиннэҕинэ ыксаллаах сулууспалар төлөпүөннэригэр иһитиннэрэргитигэр көрдөһөбүт», – диэн улуус дьаһалтатын пресс-сулууспата иһитиннэрэр.