Үөһээ Бүлүү улууһугар Бырабыыталыстыба отчуота түмүктэннэ

Бүгүн, олунньу 20 күнүгэр, Саха Өрөспүүбүлүкэтин ситэриилээх былааһа Үөһээ Бүлүү улууһугар 2024 сыллааҕы үлэтин отчуотун түмүктээтэ.

Улуустааҕы култуура киинигэр түмүктүүр мунньахха олохтоохтор көхтөөхтүк кытыннылар. Мунньах саҕаланыытыгар улуус сайдыытыгар кылааттарын иһин СӨ Бырабыыталыстыбатын бэрэссэдээтэлин бастакы солбуйааччы Дьулустаан Борисов
наҕараадалары туттарда.

Өр сыллаах үтүө суобастаах үлэтин иһин СӨ ОДьКХ-н «Коммунтеплосбыт» судаарыстыбаннай тэрилтэтин Үөһээ Бүлүүтээҕи учаастагын салайааччытын солбуйааччыта Вера Ариносова , «Саха Өрөспүүбүлүкэтин олох-дьаһах, коммунальнай хаһаайыстыбатын бочуоттаах үлэһитэ» түөскэ кэтэр бэлиэни тутта. Улуустааҕы киин балыыһа сүрүн бырааһын экэниэмикэҕэ солбуйааччыта Татьяна Абрамова, өр сыллаах үтүө суобастаах үлэтин иһин Саха Өрөспүүбүлүкэтин Доруобуйа харыстабылын министиэристибэтин, Д.С.Спиридонов аатынан улуустары гимназия минньигэс астаах асчыта Надежда Баянаева СӨ Үөрэҕин уонна билимин министиэристибэтин уонна ОДьКХ Үөһээ Бүлүүтээҕи филиалын сүрүн экэнэмииһэ Анастасия Николаева Махтал суругунан бэлиэтэннилэр. Үөрэх систиэмэтигэр кылаатын иһин 6-с №-дээх комбинированнай көрүҥнээх «Солнышко» уһуйаан иитээччитэ Мария Григорьева Саха Өрөспүүбүлүкэтин Үөрэҕин уонна билимин министиэристибэтин Бочуотун грамотатынан бэлиэтэннэ.

Үөһээ Бүлүү улууһугар отчуоттуур бөлөх салайааччыта СӨ Бырабыыталыстыбатын бэрэссэдээтэлин бастакы солбуйааччыта Дьулустаан Борисов ситэриилээх былаас уорганын ааспыт 2024 с. үлэтин ситиһиилэрин сиһилии кэпсээтэ.
Улуус баһылыга Валерий Николаев нэһилиэктэргэ отчуоттар түмүктэринэн тыл эттэ, олохтоохтор сөптөөх боппуруостары туруорсубуттарын бэлиэтээтэ.

Салгыы дьон-сэргэ улуус олоҕор-дьаһаҕар сыһыаннаах ыйытыылары биэрдилэр, санааларын үллэһиннилэр, туруорустулар.
Быыһыыр сулууспа үлэһитэ, байыаннай дьайыы кыттыылааҕа Михаил Ан Быыһыыр сулууспа дьиэтэ умайбытынан, саҥаны тутууну көрөргө, чааһынай дьиэҕэ олорор байыаннай дьайыы кыттыылаахтарыгар уокка, гааска тоҕо чэпчэтии суоҕун, социальнай тустаах көмө хайдах оҥоһулларын туруоруста.

Дьулусхаан Баппаҕай демография боппуруоһун таарыйда уонна сүрүннээн үөрэх оҕолор үөрэхтэрин хаачыстыбатынан буолбакка, үөрэххэ киириинэн, исписээлинэһи ылыынан сыаналаныахтааҕын бэлиэтээтэ.
Улуус успуорка управлениетын начальнига Егор Николаев тыа сирдэригэр интэринээт төлөбүрэ тоҕо араастаһарый, оттук тарированнай сыаната быйыл тыа сиригэр атыыга баар буолуо дуо, бөҕү тиэйии (ТКО) төһө оҥоһуллубутунан буолбакка, тоҕо киһи ахсаанынан ылылларый, «Манчаары» оонньууларыгар ат сүүрдүүтүгэр жокей анал идэтийбит маастар буолара ирдэниэхтээҕин итиэннэ СӨ успуорт министиэристибэтин бас билэр тэрилтэлэригэр үөрэнэр спортсменнар бэйэлэрин улуустарыттан кытталларын тохтоторго диэн боппуруоһу көрөллөрүгэр көрдөстө.

Балаҕаннаах нэһилиэгин баһылыга Степан Дмитриев муниципальнай сулууспа үлэһиттэрэ хамнастара кыратын, тыа хаһаайыстыбатын кыһалҕалаах боппуруостарын туруоруста.
Улуустааҕы «Дойду тыына» иистэнньэҥнэр хамсааһыннарын салайааччыта Васма Иванова бырамыысыланнай иистэнэр массыынаны туруоруста.

Үөһээ Бүлүү олохтооҕо, профессор Никита Архипов билиҥҥи уустук кэмҥэ Саха Өрөспүүбүлүкэтин Бырабыыталыстыбата таһаарыылаахтык үлэлиирин, федеральнай бүддьүөттэн элбэх үп быйыл көрүллүбүтүн, онон үрдүкү салалтаҕа улуус уопсастыбаннаһын аатыттан махтанарын эттэ. Мунньах түмүгүнэн Никита Архипов Бырабыыталыстыба ааспыт сыллааҕы отчуотун биһириирин биллэрдэ.

Элбэх кыһалҕалаах боппуруостар, туруорсуулар боротокуолга киирдилэр. Олохтоохтору долгутар сорох боппуруостарга отчуоттуур бөлөх чилиэннэрэ тутатына сиһилии быһаарыылары, быһаччы сүбэлэри биэрдилэр.
Үөһээ Бүлүү дьоно-сэргэтэ бырабыыталыстыба отчуотун сүнньүнэн биһирииллэрин биллэрдилэр, үрдүктүк сыаналаатылар.

Ааптар хаартыскаларга түһэриитэ