Үөһээ Бүлүү улууһугар икки кыбаарталга гааһы тарҕатар ситим тутуллар

Улуус икки нэһилиэгэр гаас ситимин тутуу үлэтэ барар диэн «Сахатранснефтегаз» тэрилтэ иһитиннэрэр.

Үөдүгэй нэһилиэгэр Андреевскай сэлиэнньэтигэр «Молодёжнай» кыбаартал олохтоохторун гаас утаҕар холбуурга 940 миэтирэ кэриҥэ гааһы тарҕатар ситими уурарга былааннанар. Ол 55 дьиэни «күөх төлөнүнэн» хааччыйыа.

Балаҕаннаах сэлиэнньэтигэр «Табыйыс» түөлбэ гааска холбонуоҕа. Онуоха 2370 миэтирэттэн тахса гаас ситимэ тардыллыаҕа, ол 29 ыалы холбуур кыаҕы биэриэҕэ. Гаастааһын үлэтэ алтынньы 30 күнүгэр диэри бүтүөҕэ.

«Бэлиэтээн эттэххэ, гаастааһын үлэтэ Ил Дархан Айсен Николаев көҕүлээбит «Развитие и освоение территории в целях стимулирования строительства индивидуальных жилых домов» өрөспүүбүлүкэтээҕи бырагыраама чэрчитинэн ыытыллар», — диэтэ «Сахатранснефтегаз» тэрилтэ генеральнай дириэктэрэ Алексей Колодезников.