Үөһээ Бүлүү улууһугар ыал малын уорбут киһи дьыалата суукка барда

Үөһээ Бүлүү улууһун борокуратуурата улуус киинин олохтоохторун дьиэлэриттэн сээкэйдэрин уорбут киһи дьыалатын суукка ыытта.

Силиэстийэ быһаарарынан, буруйданааччы хас да ый устата дьиэлэри кэрийэ сылдьан, хаһаайыттар суохтарыгар, эрдэттэн бэлэмнэнэн, түннүктэрин уонна күлүүстэрин алдьатан, дьиэлэригэр, ампаардарыгар киирэн, малларын-салларын уорбут. Уорбаланааччы суотобай төлөпүөннэри, дрели, бэлэсипиэти, гироскутеры уо.д.а. сойбоппут.

Силиэстийэ кэмигэр эр киһи буруйун толору билиммит, кини сарайга харайбыт уоруллубут маллара барыта былдьанна уонна сокуоннай бас билээччилэргэ төннөрүлүннэ диэн СӨ Борокуратуурата иһитиннэрэр.

Борокуратуура холуобунай дьыаланы суукка ыытта. Бу ыстатыйанан эр киһи 6 сылга диэри көҥүлэ быһыллыан сөп.