Үөһээ Бүлүү улууһугар үс бүк өрөгөйдөөх “Барахов ааҕыылара” буола тураллар

Үөһээ Бүлүү улууһугар ыытылла турар “Барахов ааҕыылара” үс бүк өрөгөйдөөх. Ол курдук, И.Н.Барахов аатынан 1-кы нүөмэрдээх орто оскуола төрүттэммитэ 150, Исидор Барахов төрөөбүтэ 128 сылыгар ананар уонна бэһис төгүлүн өрөспүүбүлүкэ таһымнаах ыытыллар.

Бу нэдиэлэҕэ Үөһээ Бүлүү улууһугар үөрэх систиэмэтэ тэриллибитэ 150 сылыгар аналлаах “Үбүлүөйдээх” педагогическай бэстибээл буола турар. Тэрээһин Москва, Санкт-Петербург, Новосибрскай, Орловскай уобалас курдук ыраах сиртэн ыҥырыылаах ыалдьыттар, эспиэрдэр кыттыылаах, үөрэх хас даҕаны хайысхатынан барар. Онтон биирдэстэринэн үтүө үгэскэ кубулуйбут, суон сураҕырбыт “Барахов ааҕыылара” өрөспүүбүлүкэтээҕи билим-мэтиэдикэ уонна үөрэх тэрээһинэ буолар. Бу номнуо сүүрбэччэ сыл тухары ыытыллар үрдүк таһымнаах ааҕыы, маҥнай улуус иһинэн барара. Кэлин өрөспүүбүлүкэ атын улуустарыттан эмиэ кэлэн, хабар иэнэ кэҥээн, кыттааччытын ахсаана эбиллэн, быйыл номнуо 5-с төгүлүн өрөспүүбүлүкэ таһымыгар ыытыллар.

“Быйылгы ааҕыыга Ньурба, Бүлүү, Хаҥалас улуустарыттан уонна кэтэхтэн Орто Халыма улууһуттан кытыннылар.

Тэрээһин оҕолорго уонна учууталларга тус-туспа барар. Оҕолорго барыта биэс сиэксийэ үлэлээтэ (экэниэмикэ, социология, кыраайы үөрэтии, филология, айылҕа үөрэҕин билимэ, тыа хаһаайыстыбата). Итиннэ барыта 104 үлэ киирдэ. Кинилэр дакылааттарын үрдүк ааттаах-суоллаах эспиэрдэр сыаналаатылар. Ол курдук, 1973 сыллаахха бэйэбит оскуолабытын бүтэрбит ытыктыыр киһибит, физика-математика билимин дуоктара, дассыан, М.К.Аммосов аатынан Хотугулуу-Илиҥҥи федеральнай университет физика-тиэхиньиичэскэй институтун теплофизика, теплоэнергиэтикэ хаапыдарытын сэбиэдиссэйэ Надежда Александровна Саввинова, “Мин биисинэһим” киин, Үөһээ Бүлүүтээҕи устуоруйа, этнография түмэлин үлэһиттэрэ, дириэктэрдэр, о.д.а. буолаллар.

Учууталларга “Педагогика ааҕыыта” диэн аатынан үс сиэксийэнэн барда, барыта 24 учуутал кытынна. Тустаах ааҕыы Исидор Бараховка, И.Н.Барахов аатынан 1-кы нүөмэрдээх орто оскуола тэриллибитэ 150 сылыгар ананарын быһыытынан, тиэмэтэ чопчу инникитин лиидэрдэри иитэн таһаарарга аналлаах. Бу сыллар тухары биһиги оскуолабытыттан элбэх лиидэр, салайааччы үөрэнэн, үлэлээн, үүнэн-сайдан тахсыбыта. Онон лиидэрдэри иитиигэ туһаайыллара оруннаах. Кыттааччылар ортолоругар мэтэдиистэр, педагогтар, оскуола түмэлин үлэһиттэрэ, инклюзияны үөрэтэр учууталлар бэйэлэрин дакылааттарын аахтылар” – диэн эбии үөрэхтээһин педагога, И.Н.Барахов аатынан 1-кы нүөмэрдээх орто оскуола түмэлин салайааччыта Антонина Хобусарова кэпсиир.

Педагогтар бэйэлэрин икки ардыларыгар уопут атастаһалларыгар, идэлээх үлэһит быһыытынан сайдалларыгар, оҕолор билиилэрин хаҥатан, саастыылаахтарын көрөн саҥа үөрүйэхтэри баһылыылларыгар ураты былаһаакка тэриллибит.

Оскуола, улуус дьаһалтата, үөрэх управлениета кыттыһан сыллата сыаналаах бириистэри туруораллар эбит. Ол курдук, быйыл кыайыылаах оҕолорго тэлэбиисэр бириистэри туттарбыттар.

Оҕолор ааҕыылара

Кылаан чыпчаал

Кыраайы үөрэтии – Анжелика Николаева (Үөһээ Бүлүү улууһун М.А.Алексеев аатынан өрөспүүбүлүкэтээҕи лиссиэй-интэринээт 7-с кылааһын үөрэнээччитэ)

Тыа хаһаайыстыбата – Ариан Васильев (Балаҕаннаах сүрүн оскуолатын 6-с кылааһын үөрэнээччитэ)

Айылҕа үөрэҕин билимэ – Сайнаара Захарова (И.Барахов аатынан 1-кы нүөмэрдээх оскуола 8-с кылааһын үөрэнээччитэ)

Тыл билимэ – Анна Алексеева (Д.С.Спиридонов аатынан улуустааҕы гимназия 9-с кылааһын үөрэнээччитэ)

Социология, экэниэмикэ – Максим Касьянов (М.Т.Егоров аатынан 2-с нүөмэрдээх оскуола үөрэнээччитэ).

Учууталлар ааҕыылара

Кылаан чыпчаал

1 сиэксийэ – “Организация работы по воспитанию будущих лидеров”, А.Е.Назарова (Хоро орто оскуолата)

2 сиэксийэ – “Методическое сопровождение воспитания будущих лидеров”, И.И.Охлопкова (Өктөмнөөҕү билим-үөрэх киинэ, физика учуутала)

3 сиэксийэ – “Воспитательная работа в контексте формирования лидерских качеств”, С.Л.Ильина (Үөһээ Бүлүүтээҕи “Тускул” оҕо киинин мэтэдииһэ).