Үөһээ Бүлүү улууһун дэлэгээссийэтэ байыаннай дьайыы сиригэр үлэлиир

Үөһээ Бүлүү улууһун дэлэгээссийэтэ  анал байыаннай дьайыы сиригэр гуманитарнай сырыынан Донецкай уонна Запорожье хайысхаларынан үлэлэрин түмүктээтилэр.

Улуус баһылыга Валерий Николаев салайааччылаах дэлэгээссийэ 34 Үөһээ Бүлүү улууһун хорсун хоһууттарын көрүстүлэр, 27 аадырыстаах баһыылкалары тиксэрдилэр.

— Бу гуманитарнай сырыыга улууспут икки волонтера кыттыыны ылаллар. Ол курдук, байыастары дойдуларын аһынан хааччыйа турар Ольга Петровна Захарова уонна Ольга Ивановна Тумусова бэйэлэрэ баҕа өттүнэн  байыаннай дьайыы зонатыгар баһыылкалары тиксэрэргэ көмөлөһөр баҕалаахтарын биллэрбиттэрэ. Маны сэргэ, байыаннай дьайыы  зонатыгар гуманитарнай сырыыларынан эрдэ үлэлэһэ сылдьыбыт дьоммут, Үөһээ Бүлүүтээҕи аэропорт салайааччыта Дмитрий Дмитриевич Иванов, Үөдүгэй дьаһалтатын үлэһитэ Иван Пантелеймонович Федоров, улуустааҕы биир кэлим диспетчерскэй сулууспа салайааччыта Егор Дмитириевич Прокопьев иккис төгүлүн кэлэн үлэлииллэр. Улуус дьаһалтатын дьыалатын салайыыга солбуйааччым Михаил Михайлович Егоров 2024 сыл сааһыгар оҥоһуллубут бастакы гуманитарнай сырыыны тэрийсиэҕиттэн барыта  6 гуманитарнай сырыыга кытынна.

Гуманитарнай сырыы сүрүн миссията — биир дойдулаахтарбытын өйөөһүн буолар. Ол курдук, Үөһээ Бүлүү улууһун бүддьүөт бары үлэһиттэрэ кыбаарталга  биир күннээҕи хамнастарын биэрэн, анал пуондаҕа үп хомуллан, байыастарбытын хас сырыы аайы туһалаах техниканан хааччыйабыт. Хас биирдии гуманитарнай сырыы — улууспут бары олохтоохторун түмсүүлээх көмөтүн түмүгэ буолар!

Салгыы Луганскай, Белгород, Курскай, хайысхатынан сулууспалыыр уолаттарбытын көрсөр, баһыылкалары тиксэрэр үлэ салҕанар, — диэн баһылык Валерий Николаев телеграмҥа ханаалыгар иһитиннэрдэ.