Үөһээ Бүлүү улууһун дэлэгээссийэтэ байыаннай дьайыы зонатыгар гуманитарнай сырыытын түмүктээтэ

Үөһээ Бүлүү улууһун дэлэгээссийэтэ анал байыаннай дьайыы зонатыгар гуманитарнай сырыытын түмүктээтэ.

Кулун тутар 30 күнүттэн муус устар 10 күнүгэр диэри Запорожье уобалаһыгар, Донецкай уонна Луганскай Норуодунай Өрөспүүбүлүкэлэргэ, ону тэҥэ Белгород, Курскай уобаластарыгар барыта 56 биир дойдулаах байыастарын көрүстүлэр. Гуманитарнай сырыы чэрчитинэн 200 кэриҥэ анал баһыылкалары тарҕаттылар. Арассыыйа саҥа эрэгийиэннэрин 4270 километр иэннээх сиринэн, барыта 30-тан тахса нэһилиэнньэлээх пууннарга, лесополкаларга, полигоннарга сырыттылар.

Байыастарга анаан үөһээ бүлүүлэр 6 матаһыыкылы, дроннары, тепловизордары, түүҥҥү прицеллары, дизель генератордарын,»Ассель» антидрон рациялары, «ТҮТ» рациялары туттардылар. Ону таһынан, волонтер Васма Васильевна салайааччылаах улуус иистэнньэҥнэрэ тикпит «Эр хоһуун» кэмпилиэк үрүксээктэрэ, Ростовтан ылыллыбыт 30 устуука тактическай үрүксээктэр, улуус дьоно-сэргэтэ баайбыт маскировачнай сиэккэлэрэ уонна араас туһалаах тэриллэр тиэрдилиннилэр.

Итини кытта Үөһээ Бүлүүтээҕи киин балыыһа анаан-минээн, бэлэмнээн ыыппыт 2014 сыллааҕы «Уаз Патриот» массыына Үөһээ Бүлүү улууһун байыаһыгар тиксэрилиннэ.

Улуус дьаһалтатын аатыттан «Донбаска көмө уонна өйөбүл хотугулуу-Илиҥҥи пуондата» салайааччытыгар  Георгий Куркутовка, «Якутия» авиахампаанньаҕа, Үөһээ Бүлүүтээҕи киин балыыһа сүрүн бырааһар Сардана Павловаҕа, Саха Сирин Новоазовскайга тирэх пуунун салайааччытыгар Игорь Поповка, Луганскайга опорнай тирэх салайааччытыгар Василий Апросимовка, Курскайга тирэх пуун салайааччытыгар Семен Копыринҥа, маны сэргэ тирэх пуун бары үлэһиттэригэр, чуолаан илдьэ сылдьан сирдээбит уолаттарга — Руслаҥҥа, Иннокентийга, Гаврилга, Василийга махталларын тиэрдэллэр. «Барҕа махтал гуманитарнай баһыылканы хомуйарга көмө буолбут дьоммутугар, биир дойдулаахтарбытыгар, чуолаан, волонтердарга Ольга Петровнаҕа, Васма Васильевнаҕа, урбаанньыттарга Елена  Михайловаҕа, Надежда Андросоваҕа, Үөһээ Бүлүү улууһун бүддьүөт тэрилтэтин үлэһиттэригэр, көмө буолбут улууспут олохтоохторугар. Үөһээ Бүлүүлэр түмсүүлээхтик кыайыыны уһансабыт, байыастарбытынан киэн туттабыт, өйүүбүт, кэтэһэбит!», — диэн улуус дьаһалтатын пресс-сулууспата суруйар.