Үөһээ Бүлүү улууһун Өргүөт нэһилиэгэр уот киирэр куттала харгыстанна

Үөһээ Бүлүү улууһугар быйыл сайын улахан ойуур баһаардара тураннар, ыксаллаах быһыы-майгы эрэсиимэ биллэриллибитэ, уоту кытары охсуһуу күүскэ барар.

Бэҕэһээ уонна бүгүн Өргүөт, Быракаан нэһилиэктэригэр «Якутлесресурс» тэрилтэ дириэктэрэ Виктор Омуков уонна Үөһээ Бүлүү улууһун баһылыга Валерий Николаев баһаарынай пууннарга уоту утары охсуһааччылары кытта көрсөн балыһыанньаны билистилэр.

«Улахан баһаар турбут Өргүөт уонна Быракаан нэһилиэктэригэр оптоволокно ситимэ уокка сиэнэн интэриниэт, суотабай сибээс суох. Билигин уот ситимин (ЛЭП) ойуур баһаарыттан харыстааһын үлэтэ бара турар. Бэҕэһээ Өргүөт нэһилиэгин ойуурун баһаарыгар өрөспүүбүлүкэтээҕи «Якутлесресурс» тэрилтэттэн 19 уопуттаах уоту умуруорааччы көмөлөһө кэллэ. Ойуур баһаара Өргүөт нэһилиэгэр киирэр куттала билиҥҥи туругунан суох. Бары күүһү уоту төгүрүтүүгэ, тутууга ыытабыт. Оттон Быракаан нэһилиэгэр ойуур баһаарын олохтоох нэһилиэнньэ итиэннэ Тюмень уобалаһыттан 25 «Авиалесоохрана» десантниктара, РФ ЫБММ 10 үлэһитэ, ону тэҥэ олохтоох ойуур харыстабылын үлэһиттэрэ уоту бохсоллор», — диэн улуус баһылыга кэпсиир.

Билиҥҥи туругунан Быракаан үрэҕин уҥуор көспүт уоту умуруорууга бары күүс ууруллар.