Үөһээ Бүлүү улууһун Өргүөт сэлиэнньэтин чугаһыгар баһаар турда

Үөһээ Бүлүү улууһун Өргүөт нэһилиэгэр ойуур баһаара бэҕэһээ киэһээ күөдьүйэн, аһаҕас уот таҕыста. Бу туһунан улуус дьаһалтатын телеграм ханаалыгар иһитиннэрдилэр. 

— Бу сарсыарда ойуур харыстабылын, баһаарынай чаас эппиэттээх үлэһиттэрин кытта баһаары умуруоруу үлэтин сүбэлэстибит, дьону хомуйан Өргүөккэ айаннаатыбыт. Билигин былаан быһыытынан, оҥоһуллубут минерализованнай балаһалартан утары уоту ыытыы үлэтэ саҕаланар, — диэн улуус баһылыга Валерий Николаев иһитиннэрдэ.

ЫБММ Саха сиринээҕи управлениета суруйарынан, Үөһээ Бүлүү улууһугар тыал күүһүрэн, Өрүөттэн 4 км сиргэ айылҕа баһаара чугаһаата.   Баһаар уопсай иэнэ 1 394 га. Уоту утары охсуһууга билигин 74  киһи уонна  11 техника үлэлиир. Баһаар нэһилиэнньэлээх пууҥҥа кутталы үөскэтэр түгэнигэр,  ЫБММ  эрэгийиэннээҕи управлениетын аэромобильнай биригээдэтэ Үөһээ Бүлүүгэ айанныырга  бэлэм олорор.