Үөһээ Бүлүү улууһун фермердэрэ уонна кэпэрэтииптэрэ саҥа салалтаны таллылар

Мунньахха «Саха сүөһүтэ» пуонда салайааччыта, СӨ фермердэр хаһаайыстыбаларын уонна кэпэрэтииптэрин ассоциациятын бэрэссэдээтэлэ Александр Артемьев, Үөһээ Бүлүү улууһун тыатын хаһаайыстыбатын салалтатын салайааччы Кирилл Гаврильев, «Үөһээ Бүлүү» ХЭТ үүт аһы оҥорон таһаарар кэмбинээт дириэктэрэ Николай Алексеев уонна улуус фермердэрэ кытыннылар.

Тэрээһиҥҥэ Үөһээ Бүлүү улууһун фермердэрин хаһаайыстыбатын уонна кэпэрэтииптэрин ассоциациятын бэрэсэдээтэлин уонна Сэбиэтин таллылар. Куоластааһын түмүгэр бэрэсэдээтэлинэн Николай Алексеев талылынна диэн Үөһээ Бүлүү улууһун дьаһалтатын пресс-слууспата иһитиннэрэр. Маны сэргэ, ассоциация сэбиэтигэр Иван Барчахов, Айсен Тюляхов, Александр Колтовской, Степан Иванов, Ирина Потапова, Анна Васильева киирдилэр.

Ассоциация 1991 сыллаахтан үлэлиир, сыала-соруга тыа хаһаайыстыбатын сайыннарыы, фермердэргэ судаарыстыбаттан көрүллэр көмө көрүҥнэрин ылыыга өйөбүлү оҥоруу, бырааптарын уонна интэриэстэрин көмүскээһин, урбаанынан дьарыктаналларыгар докумуону, отчуоту оҥорууга көмөлөһүү  буолар.

«Ассоциация үлэтин Үөһээ Бүлүүгэ күүскэ ыытан, бары тэриллиилээх, кэтэх хаһаайыстыбаларбытын түмэммит, сиэрдээх үлэни ыытарга сыаллары-соруктары туруорабыт!», — диэн этэр улуус баһылыга Валерий Николаев.