Үөһээ Бүлүүгэ устуоруйаҕа киирэр бэлиэ түгэн буолла

Бүгүн, олунньу 3 күнүгэр, Бүтүн Арассыыйа Наукатын уонна Үөһээ Бүлүү улууһун тэриллибит күнүн көрсө, улуус олоҕор ураты суолталаах, устуоруйаҕа киирэр түгэн буолла.

Үөһээ Бүлүү улууһун дьаһалтата уонна дойду биир бастыҥ научнай тэрилтэтэ — Арассыыйа Наукаларын Академиятын Сибиирдээҕи салаатын Дьокуускайдааҕы научнай киинэ (ЯНЦ СО РАН) — бииргэ үлэлииргэ сөбүлэҥ түһэрилиннэ.

Сөбүлэҥ — улуус олохтоохторун доруобуйаларын бөҕөргөтүүгэ, үйэлэрин уһатыыга уонна олохторун хаачыстыбатын тупсарыыга тиһиктээх үлэ саҕаланыыта. Сүрүн сыал — Саха сирин тыйыс усулуобуйатыгар чөл, күүстээх нацияны үөскэтии.

Үлэ сүрүн хайысхатынан муниципальнай чөл аһылык моделын оҥоруу уонна олоххо киллэрии буолуоҕа. Наука үлэһиттэрэ уонна муниципальнай былаас өбүгэбит төрүт үгэс буолбут билиилэрин аныгы наука ситиһиилэрин кытта холбоон, Саха сирин айылҕатыгар уонна олохтоохторугар сөп түбэһэр аһылык тиһигин олохтуохтара.

Олоххо киллэрии хайысхалара:

— Исписэлиистэр билиилэрин үрдэтии: Оскуолалар, уһуйааннар уонна балыыһалар аһылыкка сыһыаннаах үлэһиттэрин наука тиһиктээхтик үөрэтиэҕэ.

— Кэскиллээх стратегия: Бу үлэ улуус инники сайдыытын бигэ стратегиятын сүрүн төрүөт буолуоҕа.

«Улуус салалтата Дьокуускайдааҕы научнай киин Генеральнай дириэктэрэ Михаил Петрович Лебедевы кытта бииргэ үлэлииргэ бэлэмин иһин махтанабыт. Ону таһынан, улахан уларыйыылары миэстэтигэр олоххо киллэрэр үөрэх, доруобуйа харыстабылын уонна социальнай эйгэ үлэһиттэригэр эрэл баарын бэлиэтиибит. Наука уонна олох биир ситим буолан, Үөһээ Бүлүү улууһун сайдыытыгар саҥа кыахтары аһыаҕа диэн бигэ эрэллээхпит!», — диэн улуус баһылыга Валерий Николаев телеграм-ханаалыгар иһитиннэрэр.