Үөһээ Бүлүү урбаанньыттара кэскиллээх былааннары дьүүллэстилэр

Бүгүн, олунньу 20 күнүгэр, “Мин биисинэһим” киин Үөһээ Бүлүү улууһун дьаһалтатын кытта урбаанньыттарга анаан холбоһуктаах сүбэ мунньаҕы тэрийдэ.  

Тэрээһини улуус баһылыгын экэниэмикэ уонна үп боппуруостарыгар солбуйааччы Саргылаана Алексеева көҕүлээн ыытта. Мунньахха улууска биисинэс сайдыытыгар туһуламмыт бырайыактары дьүүллэстилэр, санаа атастаһыыта буолла. Биир сүрүн боппуруоһунан улуус социальнай-экэнэмиичэскэй сайдыытыгар бэйэлэрин сүҥкэн кылааттарын киллэрбит урбаанньыттар, эргиэн-атыы салаатын бэтээрэннэрин туһунан өйдөбүнньүк кинигэни таһаарыы буолла. Мунньах кыттыылаахтара матырыйааллары хомуйар анал эппиэттээх бөлөх састаабын таллылар. Биллэн турар, кинигэ улуус сайдыытыгар урбаанньыттар кылааттарын сырдатар улахан суолталаах историческай докумуонунан буолуоҕа.

Маны таһынан, мунньах кыттыылаахтара “Биисинэс-Бүлүү” зональнай пуоруму тэрийиини сүбэлэстилэр. Бу тэрээһин урбаанньыттарга уопут атастаһар, сибээһи олохтуур дьыалабыай былаһаакканан буолуоҕа.

Кулун тутар 6 күнүгэр улуус баһылыгын кытта “Дьыалабыай сарсыардааҥҥы аһылык” курдук сонун сүүрээни эмиэ былааннаатылар. Көрсүһүү урбаанньыттарга тирээн турар суолталаах боппуруостары быһаарыыга улахан өйөбүлүнэн буолуоҕа. Туризм уонна тыа хаһаайыстыбатын хайысхаларыгар урбаанньыттар грант куонкурустарыгар кыттыыларын боппуруостарыгар  эмиэ ураты болҕомто уурулунна.

“Бүгүҥҥү улуус урбаанньыттарын мунньаҕа үрдүк таһымнаахтык ыытыллан, бэйэ дьыалатынан дьарыктанар дьоҥҥо улахан туһалаах буолла. Атах тэпсэн олорон үгүс боппуруостары ырыттыбыт – уопут үллэстиититтэн саҕалаан, улууспутугар экэниэмикэ сайдыытын төһүүтэ буолуон сөптөөх бырайыактары олоххо киллэриигэ тиийэ. Бары кыттааччылар аһаҕастык санааларын эппиттэриттэн уонна бииргэ үлэлиир баҕалаахтарыттан, элбэх этиини киллэрбиттэриттэн ордук үөрдүм. Бу курдук бары бииргэ түмсэн сүбэлэһэн,  улууспут сайдыытыгар сүҥкэн кылааты киллэриэхпитин сөп эбит  диэн бигэ санааҕа кэллим. Тэрийээччилэргэ истиҥ махталбын тиэрдэбин”,  диэн бэйэ дьарыктаах Александр Попов санаатын үллэһиннэ.

Тэрээһини түмүктүүрүгэр улуус баһылыгын экэниэмикэ уонна үп боппуруостарыгар солбуйааччы Саргылаана Алексеева сүбэ-мунньахха көхтөөхтүк кыттыбыт урбаанньыттарга, бэйэ дьыалатын тэринэн үлэлии сылдьар дьоҥҥо истиҥ махталын тиэртэ уонна төрөөбүт улуустарын өссө далааһыннаахтык сайыннаралларыгар баҕарда. Салайааччы “Мин биисинэһим” эрэгийиэннээҕи киинигэр көдьүүстээх экэниэмикэни сайыннарыыга туһуламмыт национальнай бырайыагы олоххо киллэриигэ ыытар үлэҕэ сүҥкэн өйөбүллэрин иһин махтанна.