Үөһээ Бүлүүгэ 2025 сыл Патриотизм сылынан биллэрилиннэ

Бу күннэргэ Үөһээ Бүлүү төрүттэмитэ 90 сылын бэлиэтиир дэкээдэ ыытылла турар. Бэлиэ даатаҕа аан тэрээһининэн улуус 90 сыллаах үбүлүөйүгэр анаммыт үөрүүлээх сүбэ мунньах ыытылынна.

Мунньахха нэһилиэк баһылыктара, улуус Сэбиэтин дьокутааттара, тэрилтэ салайааччылара, үлэһиттэрэ кытыннылар. Үөрүүлээх мунньахха ааспыт сыллар үлэлэрин түмүгүн, кыайыыларын сыаналаан, улуус сайдыытыгар туһуламмыт үлэ торумнанан саҥа сыаллары-соруктары туруоруллунулар. Олунньу 10 күнүгэр оройуоннааҕы оҕо төрүүр дьиэтиттэн икки саҥа Үөһээ Бүлүү улууһун олохтоохторун таһаардылар. Үөһээ Бүлүү сэлиэнньэтигэр уонна Үөдүгэй нэһилиэгэр биирдии кырачаан эбиллибитэ биир үөрүүлээх түгэнинэн буолла. Эдэр Максимовтар уонна Семеновтар дьиэ кэргэттэрин улуус баһылыгын социальнай хайысхаҕа уонна дьиэ кэргэн бэлиитикэтигэр солбуйааччы Анна Уларова эҕэрдэлээтэ. Устуоруйа уонна этнография түмэлигэр улуус баай устуоруйатын сырдатар «90 эспэнээт» диэн улуустааҕы быыстапка арылынна.  Түмэл харайааччыта Тайыына Кононова улуус устуоруйатын, СӨ Национальнай архыыбыгар хараллан сытар докумуоннарга олоҕуран түҥ былыргы кэмнэртэн саҕалаан күн бүгүҥҥэ диэри сайдан, үгүс административнай-территориальнай үллэһиги туораабытын туһунан билиһиннэрдэ.

Салгыы О.Д. Федорова аатынан Киин бибилэтиэкэҕэ «Кэрэхсэбиллээх көрсүһүү» бырайыак алтыс тэрээһинигэр элбэх дьон-сэргэ түмсэн кытынна. Көрсүһүү ыҥырыылаах ыалдьытынан РФ үөрэхтээһинин Бочуоттаах үлэһитэ, РСФСР үөрэҕириитин туйгуна, Учууталлар Учууталлара, Үөһээ Бүлүү улууһун, Кэнтик, Хомустаах нэһилиэктэрин Ытык киһитэ Тамара Николаева буолла. Ураты дьоҕурдаах педагог, СӨ Ил Дарханын иитэн таһаарбыт ийэтэ  буоларын быһыытынан оҕо улаатан олоҕун суолун буларыгар, үөрэххэ, билиигэ талаһар дьоҕурун сайыннарыыга бэйэтин санаатын, сүбэтин кытта үллэһиннэ. Истиҥ-иһирэх кэпсэтии кэмигэр Тамара Николаева Саха сиригэр Үөһээ Бүлүү улууһа киһи хапытаалын сайыннарыыга элбэх кылааты киллэрбит улууһа буоларын бэлиэтээтэ. Киэһэтин » Н.И. Бойлохов аатынан оҕо искусство оскуолатыгар Үөһээ Бүлүү — үрдүк үөрүүм» өрөгөйдөөх тэрээһин буолан ааста. Тэрээһиҥҥэ ааспыт сыл түмүгүнэн  үрдүк хаачыстыбалаах үлэнэн бэлиэтэммит дьонугар-сэргэтигэр, урбаанньыттарыгар, тэрилтэлэргэ,  салайааччыларга, муниципальнай тэриллиилэргэ анал ааттар туттарылыннылар. Ол иһигэр 2024 сыл бастыҥ нэһилиэгинэн  баһылык Александр Кардашевскай салайар Нам нэһилиэгин дьаһалтата ааттанна.  Уһулуччулаах бэлиитиичэскэй, уопсастыбаннай, СӨ Билимҥэ Академиятын Төрөөбүт тылы чинчийэр киин салайааччыта Феодосия Габышева И.Н.Барахов аатынан бириэмийэнэн наҕараадаланна.

2025 сыл Үөһээ Бүлүүгэ Патриотизм сылынан биллэрилиннэ. Бу туһунан улуус баһылыга Валерий Николаев үрдүк сыанаттан иһитиннэрдэ. Патриотизм сылын бэлиэтин бастакынан улуус бэтэрээннэрин Сэбиэтин  бэрэссэдээтэлэ, СӨ норуотун хаһаайыстыбатын үтүөлээх үлэһитэ, биэс нэһилиэк бочуоттаах олохтооҕо Иван Чычахов, анал байыаннай дьайыы кыттыылааҕа, «Саллаат аҕата» түөскэ кэтиллэр мэтээллээх Бүлүү уонна Үөһээ Бүлүү улуустарын көрдүүр-быыһыыр сулууспатын салайааччыта Михаил Ан уонна юноармеец, Марк Трофимович Егоров аатынан Үөһээ Бүлүүтээҕи 2-с нүөмэрдээх орто оскуолатын 10-с кылааһын үөрэнээччитэ Айтал Егоров туттулар.

Олунньу 11 күнүгэр Үөһээ Бүлүүтээҕи киин балыыһа 1-кы терапевтическэй отделыгар Аҕа дойду Улуу сэриитин, тыыл бэтэрээннэригэр, огдооболоругар, сэрии кэмин оҕолоругар уонна анал байыаннай дьайыы кыттыылаахтарыгар, төрөппүттэригэр анаммыт «Бэтэрээннэр балааталара»  гериатрическай балаата арыллан үлэтин саҕалаата.   Гериатрическэй балаата 3 миэстэлээх. Күн бүгүн бастакы 3 эмтэнээччи балаатаҕа киирдилэр уонна 10 хонук устата доруобуйаларын көрдөрүөхтэрэ, эмтэниэхтэрэГериатрия балаататыгар суруттарыы Социальнай көмүскэл салалтатын нөҥүө ыытыллар. Бэлиэ түгэнинэн улуус дьаһалтатын аатыттан оройуон баһылыга Валерий Николаев реабилитациялыыр мэдиссиинэ оборудованиетын ыларга сэртипикээт туттарда.