Үөһээ Бүлүүгэ История уонна этнография түмэлигэр Анисим Прокопьев аатын иҥэрдилэр

Үөһээ Бүлүү улууһугар биллиилээх норуот маастара, Аҕа дойду сэриитин кыттыылааҕа Анисим Прокопьев төрөөбүтэ 100 сылын киэҥник бэлиэтииллэр. Бу туһунан «Үөһээ Бүлүү» хаһыат ТГ-ханаала иһитиннэрэр. 

Бүгүн, балаҕан ыйын 8 күнүгэр, бу бэлиэ күн чэрчитинэн, кини бэйэтэ тэрийбит улуустааҕы История уонна этнография түмэлигэр сырдык мөссүөнүн үйэтитэр бюст үөрүүлээх быһыыга-майгыга арылынна. Бюст ааптара — Анисим Григорьевич сиэнэ, биллиилээх скульптор Николай Чоччасов.

Үөрүүлээх тэрээһиҥҥэ Николай Никитич эһээтин бюһун таайынан, СӨ үөрэҕириитин туйгуна, үлэ бэтэрээнэ Анисим Анисимовичтыын арыйда. Бу бюһу Анисим Прокопьев оҕолоро түмэлгэ үйэлээх бэлэх оҥордулар. Тэрээһиҥҥэ улуус баһылыга Валерий Николаев кыттыыны ылан, мустубут дьоҥҥо эҕэрдэ тылын эттэ. Ону таһынан, түмэл дириэктэрэ Изабелла Саввинова улуустааҕы түмэл Анисим Прокопьев аатын сүкпүтүн туоһулуур кэриэстэбил дуосканы аста.

«Мунньах үөрүүлээх чааһыгар Анисим Григорьевич мөссүөнүн мэҥэ тааска үйэтиппитин иһин биллэр скульптор худуоһунньукка, ССРС уонна Арассыыйа худуоһунньуктарын уонна уустарын сойууһун чилиэнигэр, Анисим Прокопьев сиэнигэр Чоччасов Николай Никитичка «Үөһээ Бүлүү улууһун социальнай экэнэмиичэскэй сайдыытыгар уһулуччу кылаатын иһин» бочуоттаах анал бэлиэни туттардым. Мунньах кэннэ Үөһээ Бүлүүтээҕи история уонна этнография түмэлигэр Анисим Григорьевич бюһун төрөөбүтэ 100 сылыгар ананан туруорулунна. Маны сэргэ биир бэлиэ түгэн — улууспут история уонна этнография түмэлигэр Анисим Григорьевич Прокопьев аата иҥэрилиннэ», — диэн улуус баһылыга Валерий Николаев бэлиэтээтэ.

Анисим Григорьевич Прокопьев — Аҕа дойду сэриитин кыттыылааҕа, Саха АССР култууратын үтүөлээх үлэһитэ, ССРС доруобуйатын харыстабылын туйгуна, ССРС худуоһунньуктарын уонна тимир уустарын Сойуустарын чилиэнэ, «Гражданскай килбиэн» бэлиэ хаһаайына, талааннаах тимир, мас ууһа, муосчут уонна скульптор.