Үөһээ Бүлүүгэ аныгы технологияларга үөрэтэр лааҕыр аһылынна

Үөһээ Бүлүү улууһун «Тускул» оҕо айымньытын киинэ социальнай сакааһынан кылгас кэмнээх сайыҥҥы бырагыраамалары саҕалаата.

Бу нэдиэлэттэн оҕолор икки хайысханан: тэхиниичэскэй – «Анимация төрүттэрэ», (сал. А.П.Григорьева) уонна уус-уран – «Сайын уонна айар дьоҕур» (сал. М.П. Павлова) дьарыктаныахтара. Уопсайа 60-тан тахса оҕо сылдьара былааннанар.

Кэнники сылларга Үөһээ Бүлүү улууһун оҕолоро ойулук оҥоруутугар өрөспүүбүлүкэҕэ эрэ буолбакка, федеральнай таһымнаах куонкурустарга ситиһиилээхтик кыттар буоллулар. Быйыл сайын 1-9 кылааcтар оҕолоро анимация куруһуогар Олоҥхо дьиэтигэр сылдьыахтара. Оҕолор анимация биир көрүҥүн – 2D ойулук оҥорууну баһылыахтаахтар. Билигин оҕолор аныгы технологиялары түргэнник өйдүүр буоланнар, үрдүк таһымнаах билиини ылаллар. Оттон бу киирбит оҕолор сахалыы муултугу оҥорууга бастакы хардыылара буолар.

Быйылгы сайыҥҥы дьарыкка үгүстэрэ И.И. Седалищев аатынан Оҕо дьиэтин иитиллээччилэрэ киирдилэр. Оттон хаһыс даҕаны сылын «СаҥаStep» куруһуогар дьарыктанар оҕолор Эрчим Кононов (8-с кыл.), Белла Степанова (7-с кыл.) уонна Амелия Прокопьева (6-с кыл.) үрдүкү кылаас оҕолорун бөлөхтөрүгэр хамандыырдарынан буоллулар.

Сайыҥҥы лааҕыр аһыллыыта бэс ыйын 9 күнүгэр былааннанар, онно оҕолор ырыа-тойук, үҥкүү бэлэмнии сылдьалларын туһунан тэрийээччи Марианна Оконешникова этэр.

«Бүгүн нуучча улуу суруйааччыта А.С. Пушкин төрөөбүт күнүгэр анаммыт тэрээһиҥҥэ оҕолор хоһоон ааҕыытыыгар холонон көрүөхтэрэ. Өссө Тулалыыр эйгэни харыстааһын күнүнэн экологическай аахсыйаҕа кыттыһан бытыылка хаппаҕын уонна батареялары хомуйдулар», — диэн кэпсиир Үөһээ Бүлүүтээҕи Оҕо бибилэтиэкэтин бибилэтиэкэрэ Мая Захарова.